阻街示威磨爛蓆 搞死香港誰埋單

大家有眼睇喇，佔領行動吹雞之後，金鐘、中環、銅鑼灣、旺角同尖沙咀相繼「淪陷」，佔中擴大為佔港，平時車水馬龍，遊客如鯽嘅鬧市，即時水盡鵝飛，生人勿近。部分受影響地區有居民同商戶因為馬路被佔，影響生活同生意，導致損失慘重，怨氣沖天，同示威人士頻頻發生衝突，直頭亂過亂世佳人。

繁華鬧市淪為「戰場」，經濟民生更受重創。金融市場持續震盪，股匯雙雙急挫，樓市交投萎縮，內地暫停旅行團來港，令旅遊、零售、餐飲同酒店業雪上加霜。受影響地區好多店舖焗住拉閘，就算開門營業都拍晒烏蠅，連燈油火蠟都蝕埋，你話死唔死吖。

「十一」黃金周唔見金已經夠傷，旅遊業界估計，之後嘅情況可能會更差。更令人擔心嘅係，政治環境不斷惡化，有銀行報告預期，投資者望到頸都長嘅滬港通，隨時推遲「開車」甚至「死火」添！佔中唔知幾時收科，香港呢鋪真係想唔衰都幾難咯，叮！

嗱，睇吓市民點講啦。「東方報業民意調查」結果顯示，如果佔中活動持續，有四成二受訪者最擔心經濟活動受影響。政局不穩，投資者入市意欲下降，地產界預料睇樓量急跌，有近三成受訪者擔心長期佔中會令樓價下滑。股市係經濟晴雨表，超過三成受訪者擔心政治氣氛會影響金融市場；三成一人擔心政治環境會令投資者卻步。

有立法會議員警告，佔領行動唔止令內地叫停旅遊團，亦造成多國向本港發出旅遊警示，睇怕旅遊業嘅嚴冬就要殺到。旅遊業冇啖好食，零售、酒店、運輸及娛樂等亦統統走唔甩。近四成半受訪者認為，佔中對本港經濟造成嘅損失無可估計；更有近兩成人擔心出現倒閉同裁員潮。

無論點講都好，佔中對整體經濟嘅打擊已經愈來愈明顯，反對派為咗達到不可告人嘅目的，無所不用其極，嚇唔到中央，但好好嘅香港就畀佢哋搞到烏煙瘴氣，七國咁亂。乜鬼「自己香港自己救」吖，實情就係「自己香港自己毀」，呢筆數，港人遲早要搵佢哋埋單，叮！