點止誤人子弟 更加禍港殃民
佔中搞到天怒人怨，太一叮發思古之幽情，諗起「君不君則犯，臣不臣則誅，父不父則無道，子不子則無孝」嘅古訓，即係社會上每個人都應該各司其職，做好本分，如果唔係，天下就會大亂嘞。家陣嘅香港就係咁，有啲老師唔似老師，有啲學生唔似學生，唔怪得教育烏煙瘴氣，大學國際排名江河日下啦。
係人都知，為人師表，係以傳道授業解惑為己任。可惜吖，香港唔少老師濫竽充數，得半桶水咋。呢，有大學最近為逾百名教研人員就教學、研究及服務三方面嘅表現進行內部評核，結果令人大跌眼鏡，居然多達三分一人不達標，其中既有講師，又有副教授，面臨被叮走。
講真，大學教師質素良莠不齊，泥沙俱下，都唔係乜嘢新聞咯。好似死唔斷氣嘅佔領行動咁，搞手之中不乏大學學者，仲有法律學者添，佢哋自己唔守法不特止，仲利用年輕學生嘅熱情同理想，鼓動佢哋犯法，美其名公民抗命，實際上為滿足自己不可告人嘅政治目的，驅使學生做炮灰。呢班所謂學者搞風搞雨，白白斷送年輕人嘅前途，唔止教壞細路，直情禍港殃民喇。
社會政治化，被政治入侵嘅何止大學校園，仲有中小學，甚至連幼稚園學生都唔放過，真係冇陰功。嗱，金鐘佔領區有個幼稚園教師，日日開壇洗腦，可憐幾歲嘅幼童被灌輸仇警仇官意識，幼小心靈就咁被污染，第時大個咗，容乜易郁啲反政府、郁啲鬧警察吖。仲有呀，早前有位小學教師公然喺街頭爆粗辱警，佢所屬嘅組織係最粗嘅粗口諧音，仲扮到大義凜然咁款，唔係誤人子弟係乜呀！
正所謂，臭罌出臭草，校園歪風勁吹，年輕一輩有乜法子唔受荼毒吖。大家有眼見o架，中學生又好，大學生又好，唔少好似撞邪咁，有書唔讀，有學唔返，日日掛住瞓街抗爭，罷課當食生菜，勸又勸唔聽，鬧又鬧唔醒，莫講話知識冇增長吖，將來連搵食都成問題。哈，自己前途都未顧掂，仲夠膽話為咗香港爭取更美好明天喎，有冇再幼稚啲、天真啲、冇腦啲吖。
冇計啦，香港由小漁村發展成為國際大都會，得來不易o架，家陣畀佔中搞一搞，七國咁亂，乜嘢根基都爛晒，乜嘢核心價值都毀晒。孔老夫子若泉下有知，一定都係嗰句：吾不欲觀之矣。叮！
