「加持」本來係一個宗教用語，即係一啲法器，經由一啲有法力嘅高僧或道行較高嘅人士唸經強化，令到一件法器威力靈力增強。唔知幾時開始，呢個宗教儀式「加持」成為咗潮語，意思都係同本身宗教行為差唔多。不同嘅係，「加持」嘅人當然唔係法師道士，而係有權力有勢力嘅人，又或者係一啲名人明星之類。被「加持」可以係一啲不知名人士或一些行動。

例如有一啲不知名網民發起嘅行動，如得到一啲社會知名人士「加持」，效果當然會好啲。又例如喺辦公室，有部門主管想推行新政策，如果背後得到大老闆「加持」，做細嘅又點可以輕易反對？「加持」嘅意思同英文嘅「BLESSING」，可以話係共通。當有啲人得到阿爺嘅「祝福」，自然可以為所欲為。

雨傘運動未完，秋天都未過，算帳就已經開始，講緊嘅當然就係比中央台更親中央嘅CCTVB。事緣有警員在「暗角打鑊」示威者，被TVB新聞部全程拍低之後，新聞部一男子竟然下令改動原先嘅新聞稿，惹嚟無記前線新聞工作者「起義」，冒住被炒魷嘅風險而發出聯署聲明，宣示對新聞部管理層的不滿。前線員工咁做，當然贏得掌聲，但係亦要承受被公司「秋後算帳」嘅結果。CCTVB管理層正式將當日拍攝「暗角打鑊」嘅員工調離前線，即係俗稱「燉冬菇」，有人覺得此舉相當無恥，不過相信新聞部那一男子，絕對唔會因為網民們狂插而改變主意。作為主管，處事毋須顧慮甚麼禮義廉恥，最緊要係公司管理層有法力人士「加持」，咁就可以要幾禮義廉有幾禮義廉。無論市民鬧得幾大聲，佢都可以繼續印印腳，做佢嘅維穩工作。又唔係你出糧畀佢，係咪先？

田少公然叫特首考慮辭職，唔知係咪得到一啲有法力人士「加持」就不得而知。有陰謀論者認為，田少咁做係一個局，係為二○一七嗰個「普選」而搭嘅「雞棚」，讓田少入閘選特首。係真係假不得而知。我淨係知，無論我哋點努力爭取民主，都唔會有人「加持」！

第一手消息請下載on.cc東網iPhone/iPad/Android/Windows Phone Apps