消防處不務正業 特遣隊多此一舉

係咁嘅，自從歐盟五期柴油列為零稅率貨品之後，不法分子利用郊區或者露天停車場設立流動油站，油缸車非法賣油愈來愈普遍。消防處月前設立特遣隊，負責「放蛇」、制訂行動計劃，指揮警方、海關嘅聯合行動，仲話做法係主動出擊，唔係等人哋上門舉報喎。

打擊非法加油站冇問題，問題係由消防處主導執法，就有好多爭議嘞。嗱，有前線人員大吐苦水，話經營非法加油生意嘅，唔係善男信女，多數會有「背景」，有備而來。而消防處係紀律部隊中少數「手無寸鐵」嘅部門，加上消防隊長通常一支公做嘢，遇到對方發爛渣就報警求助。家陣主動出擊調查，未必次次都同海關、警方聯合行動，特遣隊員分分鐘要「單打獨鬥」，咁搞法，等於「送人去死」啫。

再講吖，放蛇呢家嘢，本來係警隊嘅拿手好戲，消防員淨係識救火，未接受過刑事調查訓練，跨職業做嘢可能力不從心，未必能夠達到預期效果。風險高，效果微，消防員仲要面對自身安全風險，請班人返嚟，咪盞浪費公帑？唔怪得有前線消防員篤爆，「須具備十至廿年執行消防火警危險法例經驗」嘅招聘標準，明顯係為咗「翻閹」退休人員度身訂造。亦有立法會議員質疑，港府表明節省各部門資源情況下，消防處仍然開位請人，特遣隊風險同效果唔成比例，完全係浪費公帑。

話時話，不務正業、浪費公帑呢家嘢，消防處紀錄已經厚過電話簿喇。近年本港一再發生塌樓及火警悲劇，原因就係消防處監管失職，執法甩漏。最離譜嘅係，消防處唔做消防，反而得閒客串警方、海關角色，甚至充當打擊新聞自由嘅爛頭蟀，你話係咪倒行逆施吖。前消防處處長陳楚鑫退休嗰陣，更動用大量人力物力大搞「擦鞋退休騷」，肉麻當有趣，簡直唔知醜字點寫。

呢次消防處設立特遣隊，一樣係阿茂整餅，冇嗰樣整嗰樣，未成軍已被鬧爆有乜出奇吖。計太一叮話齋，消防處不如將呢筆公帑用喺正經地方，就算放蛇，請多幾個人巡吓舊區商廈嘅後樓梯，根除安全隱患仲實際喇，叮！