葡萄牙又輸波、「佗衰」皇馬！有新領隊費蘭度山度士上任嘅葡萄牙，昨晨領軍第1擊就喺熱身賽以1:2輸畀法國，最弊係王牌球星C朗拿度下半場傷出，要即時為左腳膝頭敷冰。消息指C朗準備喺周三凌晨作客丹麥嘅歐國盃大戰上陣，分分鐘傷上加傷，月底皇馬對巴塞隆拿嘅「國家打吡」，C朗隨時踢唔到！

法國2:1葡萄牙
C朗全場波不斷被法國守將粗野攔截，多次坐喺地下向球證投訴。（美聯社圖片）

C朗（中）被嚴密看管，冇啖好食。（美聯社圖片）

今夏世界盃羞家出局後，葡萄牙喺歐國盃外圍賽首仗對阿爾巴尼亞都輸埋波，不過新帥費蘭度山度士接手亦難止頹勢，尋日葡萄牙作客法國又輸1:2，呢個戰果對皇馬教練安察洛堤嚟講真係一啖沙糖一啖屎，雖然賓施馬一射一傳成為法國贏波功臣，但近期入波停不了嘅C朗踢咗75分鐘就勇戰傷出，認真大鑊。

膝傷未斷尾 隨時缺席國家打吡

C朗傷出後喺後備席第一時間用冰敷左膝，呢個畫面被西班牙傳媒視為一大警號，事關C朗半年前左膝受傷後一直未斷尾，4月份曾養傷2個星期，之後喺西甲最後衝刺嗰幾場大戰亦缺陣。最慘係葡萄牙周三凌晨歐國盃外圍賽要作客丹麥，由於首戰已經倒灶，葡軍絕對係不容再失，亦即意味住C朗又要頂硬上，好可能令佢傷上加傷，甚至缺席月尾對巴塞隆拿嘅西甲大戰。

世冠盃抽籤 皇馬4強鬥硬嘢

如果C朗再觸傷舊患，對賽程緊密嘅皇馬嚟講都幾頭痛，事關12月喺摩洛哥舉行嘅世冠盃尋日進行抽籤，直入4強嘅皇馬會鬥亞冠盃冠軍或墨西哥藍十字嘅勝方。雖然非洲依家被伊波拉病毒陰影籠罩，不過皇馬總監布達堅奴表明冇有怕：「我哋當然關注事態發展，依家距離賽事有2個月，我哋會完全遵從醫療專家嘅指示。」