流會鬧劇頻上演 垃圾政棍醜態多

立法會大會原定尋日傾成立創新及科技局，點知啱啱爭一個唔夠法定人數而被迫流會，曠工嘅三十六位議員（超過議員總數一半）跨越黨派，既有建制派，亦有反對派，真係唔到你唔服。有人話家陣立法會最大勢力嘅唔係建制亦唔係泛民，而係「蛇王派」，真係一啲都冇講錯o架。

嗱，癲狗咬人唔係新聞，人咬癲狗至係新聞，班議員無心正事，懶到出汁，流會已經係家常便飯咯。佢哋藉口多多，有人賴塞車，有人賴出埠，有人話另有要事，有人索性龜縮唔回應，真係醜態百出。不過咁，家陣佔領運動死唔斷氣，今次「流會」除咗因為議員偷懶，更加係反對派癱瘓施政嘅武器。不合作吖嘛，阻撓創科局通過吖嘛，咪專登搞亂檔囉，有負責官員話希望日後議員同政府配合，簡直太傻太天真。

冇計啦，立法會有名你叫垃圾會，梗係有破壞冇建設啦。反對派政客搞風搞雨，阻頭阻勢固然乞人憎，但唔好唔記得，建制派始終有人數優勢，如果佢哋全部到齊，又點會流會吖，所以話啫，反對派也好，建制派也罷，呢班政客冇個似樣，全部都係食塞米嘅垃圾嚟嘅。

不過咁，就算開得成會，亦唔代表做得到嘢。大家有眼睇，立法會復會以來，照舊係吵吵鬧鬧，嘈喧巴閉，半件實事都冇做過，淨係工務小組委員會，上半年積壓嘅二十一項政府工程至今仍然寸步難行，連醫院翻新一類爭議唔大，但同民生息息相關嘅工程，都因為拉布而受阻，政府想話創科局喺立法會過關，發夢冇咁早，而排住隊嚟嘅三堆一爐、在職貧困家庭津貼、公務員加薪等，睇怕亦唔會有運行。

講到呢度，太一叮心情有啲矛盾。政棍生人霸死地，叫做嘢人人隱形，攞着數個個爭先，如果換作普通打工仔，炒魷魚十次都唔夠；之但係佢哋肯蒲頭亦唔見得係好事，掟蕉爆粗睇鹹相樣樣齊，做嘢又死，唔做嘢又死，香港死路一條，最終受害嘅都係普羅大眾，你話係咪冤過竇娥吖。

都係嗰句，政棍混帳，立會癱瘓，市民遭殃。計太一叮話齋，反正都係垃圾會，不如乾脆摺埋送去堆填區，當幫納稅人慳番筆都好吖，叮！