佔中製造垃圾山 香港就快變臭港

大家有眼見，佔中行動搞到全城烏煙瘴氣，七國咁亂，學生返唔到學，商舖開唔到門，打工仔返唔到工，怨聲載道。咁都唔止，街頭運動仲製造一籮籮垃圾添。嗱，淨係佔中人士用過嘅膠水樽，呢幾日已經堆積如山，再咁落去，唔好講佔領癱瘓香港，淨係垃圾都搞到陸沉喇！

唔係太一叮亂講。有環保團體呢幾日去中環、灣仔同金鐘等佔領現場睇過，點算現場樽裝水嘅數量，再計算相關消耗量，推算出三個佔領點至今已消耗超過一百五十萬個膠水樽。膠水樽數量龐大不特止，當中有三成更加係未飲晒就被棄掉，甚至有未拆封嘅食物同新簇簇嘅物資添，團體話即使出動全體三百幾名義工廿四小時分類回收都做唔切。加上道路被佔，垃圾車無法進入垃圾站，大批垃圾就咁放喺行人路，搞到臭氣熏天，分分鐘傳播病菌，成為疾病傳播嘅搖籃，都咪話唔得人驚。

咦，咪住，示威者開口埋口改變社會，點解唔先改變自己嘅行為模式呢？點解唔身體力行保護環境呢？市民未見到「讓愛與和平佔領中環」，先見到「讓垃圾與臭氣佔領香港」，點會唔怒火中燒吖。

黃台之瓜，何堪再摘。現有三個堆填區好快陸續爆滿，垃圾圍城危機已經迫在眉睫，家陣佔中製造垃圾崗，堆填區再要額外啃咁多垃圾，「垃圾港」容乜易噩夢成真o架。

講開又講，都市廢物與日俱增，擴建三堆一爐始終勢在必行。弊在環保官僚無能到極，結果搞到擴建寸步難行。唔係咩，三堆一爐之所以反對聲音咁大，除咗無良政客抽水拖後腿，當局冇做好諮詢、宣傳同游說工作，以為側側膊唔多覺就可以上立法會攞撥款，結果咪進退失據囉。

三堆一爐此路不通，政府扶助回收業同樣係講多過做，至於推動垃圾源頭分類咯喎，更加係得啖笑，淨係三色回收桶咁簡單嘅事都做到甩甩漏漏，有啲地區幾十個垃圾桶只得一套回收桶，問你服未。

一句到尾，佔中可望終結，但係垃圾問題仲係咁不斷惡化，唔該環保官僚快啲做嘢，唔好咁垃圾得唔得？叮！