公屋供應不增加 如何計分也枉然

可能當局都知衰啩，為咗減輕公屋輪候壓力，加快上樓，房委會決定下年度調整非長者單身人士配額計分制，撥出嘅單位上限亦由二千個增至二千二百個。詳情係咁嘅，現時公屋輪候冊會按輪候者年齡加分，調整後將會由每年加三分增至加九分，四十五歲以上嘅輪候人士更會一次過加六十分添。不過年輕單身人士就慘嘞，佢哋會被扣分，上樓嘅機會更加渺茫。

即係咁，年長單身人士缺乏向上流動能力，當局為佢哋加分，等佢哋快啲上樓，出發點係無錯嘅，尤其公公婆婆，年紀一大把，仲要佢哋癡癡地等，根本唔係辦法。之但係，當局加快年長人士上樓嘅同時，變相剝削年輕申請者上樓嘅機會，必然惹起爭議，講真吖，有頭髮邊個想做瘌痢，人人都想住洋樓養番狗啦，問題係有冇咁嘅能力啫。

冇錯，公屋作為一種社會福利，主要用來照顧弱勢階層，年輕人應爭取自己解決居住問題，可惜港府房屋政策失敗，搞到樓價租金飛升，年輕人成為畸形樓市下嘅犧牲品。當局唔係想辦法幫助佢哋安居，反而「懲罰」佢哋，就算可以稍為縮短其他人士嘅輪候時間，都不過係挖東牆補西牆，自欺欺人嘅咋。

所以話，加分又好，扣分又好，根本於事無補。講到底，要標本兼治，辦法只有一個，就係增加土地及房屋供應。但實情係港府黔驢技窮，束手無策。呢，房委會早前公布，今年度新落成公屋單位只有九千八百個，較上年度大幅下跌逾半，就算連同翻新及回收嘅一萬五千個舊單位，亦只有二萬五千個可供編配，數量創十七年新低，反觀輪候冊宗數則直逼二十五萬大關。你話嘞，公屋供應杯水車薪，輪候人士要上樓只能鬥長命，民怨唔大就奇喇！

現屆政府話就話將房屋問題視為施政重中之重，點知覓地建屋寸步難行，雙辣招仲適得其反，樓價止跌反升。好嘞，家陣佔領行動搞到香港七國咁亂，經濟大受打擊，政府幾近癱瘓，再咁落去，話唔埋樓價崩潰，暴瀉至○三年沙士水平都似，叮！