水署賴皮十七年 業主有苦誰人知

嗱，水務署到底有幾賴皮，聽吓申訴專員公署點講啦。該署早前接獲一大型屋苑法團舉報，指九七年獲地政總署就發展商所建嘅公共設施發出「滿意紙」，政府部門理應即時接管設施，點知水務署居然大耍太極，拒絕接收水管及消防龍頭，堅持要業主交出圖則先肯接收，結果一拖就係十七年，問題到家陣都未解決，問你服未。

正如申訴專員話齋，小業主根本無可能有圖則，水務署應該一早向發展商索取，家陣咁做，唔係玩嘢，就係強人所難。仲有呀，水務署衰到反指地契無規定發展商鋪水管，言下之意，即係閣下自理，概不負責咁話。更令人氣憤嘅係，地政總署及消防處仲要助紂為虐，一個幫手逼迫小業主交出圖則，另一個就要小業主斥資維修，小業主有冤無路訴，唔谷氣就假嘞。

喂，當局批地起樓嗰陣，列明相關街道屬於公共設施，發展商負責興建，之後由政府接管，白紙黑字，清清楚楚，點解其他政府部門依時接管街道，偏偏水務署死拖爛拖呢？呢啲唔係卸膊係乜呢？廣告都有講，今時今日咁嘅服務態度，點得o架。計太一叮話齋，水務署賴皮成咁，何止點得o架，直情死得啦，叮！

衰開有條路，水務署嘅賴皮嘢點止咁少吖。審計署批評，水務署多年來未有正視商戶偷水同埋水錶不準確嘅問題，間接導致偷水情況惡化，令庫房一年損失近一億六千萬元，你話係咪敗家吖？咁仲唔止，水務署維修不力，水管爆完又爆，馬路噴泉無日無之，大量耗費資源又十分之擾民，好似前排灣仔、銅鑼灣、跑馬地及大坑區又因為水管故障導致制水十小時，商戶損失慘重，叫苦連天，市民怨聲載道，簡直靠害。難為水務署仲好意思呼籲市民節約用水，其實佢哋先至係最大嘅浪費者。

水務署年年高居投訴榜前列位置，唔係被申訴專員炮轟，就係被審計署怒批，已經唔係新聞喇。可惜吖，意見接受，態度照舊，至今依然冇改善。講到尾，做官不為民作主，不如回家種紅薯。水務官僚繼續賴皮卸膊，港府高層竟然聽之任之，莫可奈何，簡直天大笑話，叮！