來港前喺北京鳥巢以0:2不敵巴西、滿肚冤屈嘅阿根廷，尋晚喺大球場拎香港隊做「出氣袋」，以7:0大勝一仗！「球王」美斯雖然到下半場61分鐘先後備入替，但依然交出2個入波同1個助攻，總算為入場嘅2萬多名香港球迷，搵番久違嘅90分鐘開心快樂時光。

香港0:7阿根廷
球王個人突破

美斯（左）同希古恩（中）今次訪港交足晒貨，球迷梗係笑逐顏開啦！

天使殺出重圍

希古恩跳頂

美斯準備離港嗰陣，被一大班粉絲包圍。

一如本報賽前披露，最受球迷愛戴嘅幾位「巨星」美斯、迪馬利亞同阿古路，上半場都坐喺後備席上面，阿根廷正選陣容入面得前鋒希古恩、中場加高同柏斯托尼較具名氣。不過堂堂世界二哥阿根廷，即使用後備兵一樣咁堅，一開波就壓住主隊狂攻，一對邊路球員包括巴黎聖日耳門嘅柏斯托尼，以及賓菲加嘅奧斯華度加坦，不斷輪流發難，搞到由張健峰、陳偉豪、科夫同李志豪組成嘅港隊防線風聲鶴唳。13分鐘，柏斯托尼左路後上控定狂抽，葉鴻輝及時封位擋出，不過港隊過到初一過唔到十五，6分鐘後奧斯華度加坦右路起腳，葉鴻輝擋出不遠，李志豪解圍「撻Q」，個波咁啱跌落班尼加面前，呢位西維爾中場一句唔該為客軍先開紀錄。

One Two再「唧入」 1扭5技驚四座

領先後嘅阿根廷攻勢並冇放緩，除守門員，幾乎10名球員都有參與進攻，戰至42分鐘，左閘雲基安尼後上傳入禁區，希古恩第一時間頂入網，為阿根廷領先到2:0；完半場前，奧斯華度加坦左腳抽入，3:0完上半場。

換邊後，兩隊均有調動，雖然「大家最期待嘅畫面」仲未出現，不過54分鐘希古恩就喺無人看管下入多粒，領先到4:0嘅阿根廷，領隊馬天奴決定喺61分鐘氹香港球迷，換入美斯，「散步帝」唔再散步，一出場5分鐘就同班尼加一次One two爆入禁區，快出迎嘅葉鴻輝一步「唧入」成5:0，全場球迷個個High爆！72分鐘，接應美斯二傳射成6:0嘅奧斯華度加坦被換出，由另一巨星迪馬利亞入替，同一時間馬斯真蘭奴亦後備亮相。85分鐘，美斯右路爆入禁區，推入中路喺5名港隊球員包圍下，起左腳射成7:0，技驚四座！

票房未如理想

是役入場人數為20,230人，購票人數為18,751人，收入錄得港幣$14,703,510。賽後足總主席梁孔德同CEO薛基輔，異口同聲話對票房感到失望，梁主席補充經初步點算後，相信要蝕數百萬港元。CEO則指連同之前嘅巴西國家隊，兩次重量級國家隊訪港嘅票房皆未如理想，相信未來足總再辦外隊訪港的話，會傾向邀請球會。由於出年大球場「閉關」重鋪，暫時不會再邀請外隊訪港。