立會政爭無了期 市民福祉無人理
尋日旺角一度出現近日難得一見嘅太平景象，酒樓顧客盈門，遊客開心血拼。咁又難怪嘅，佔領行動阻住地球轉，搞到天怒人怨，家陣部分彌敦道「重光」，大家梗係拍爛手掌啦。可惜吖，到咗夜晚又有示威者衝擊警方防線，有人甚至搶奪警棍添，結果再次引起衝突，七國咁亂。
所以話，樹欲靜而風不止，幕後黑手唔肯收手，佔中鬧劇又點會咁快落幕吖。呢，因佔中亂局而被迫押後一星期復會嘅立法會，日前喺一片吵鬧聲中開鑼，原本以為可以做番啲實事啦，點知事與願違，議員講來講去都係佔中話題，反對派同建制派各執一詞，議事堂上吵吵鬧鬧，嘈喧巴閉，仲亂過街頭示威場面。有人形容立法會休會前被拉布佔領，休會後被佔中行動佔領，真係一啲都冇講錯。
即係咁，尋日下午財委會終於開始審理同民生相關嘅議題，第一項係大嶼山廚餘回收廠及三堆一爐嘅撥款申請。不過咁，如果大家以為議員肯坐低認真審議，咁就太傻太天真嘞。有反對派議員事先張揚提出多項臨時動議，亦有人提出休會議案，加上議會外有團體抗議擴建堆填區，喺重重阻力之下，三堆一爐隨時又係跪低收場嘅咋。
一拖俱拖，一延俱延，三堆一爐受阻，其他排住隊嘅民生議案，包括低收入在職家庭津貼及公務員加薪，相信亦只能被迫延後，唔知幾時至可以通過。至於成立創新科技局同埋新界東北發展計劃等，就更加唔使諗，特別係新界東北發展計劃，由於反對派政客早前突襲成功，將一向由建制派做開嘅工務小組主席搶到手，到時仲唔玩嘢咩，新界東北發展計劃要成功闖關，可以話係不可能嘅任務。
話時話，議事堂淪為政治角力嘅鬥獸場，都唔係今時今日嘅事咯。有啲政客動不動就拉布，動不動就流會，搞到議會空轉，施政癱瘓，香港沉淪。咪睇班政客平時滿口民主自由，仁義道德，其實為達到個人政治目的，無所不用其極，又點會關心公眾利益吖。
諗落都幾悲哀，今日香港政治凌駕一切，經濟民生無人關心，再咁搞落去，遲早玩完嘅咋。始終都係嗰句，悠悠萬事，民生為大。政治唔可以當飯食，無良政棍就話有幕後金主養起，搞風搞雨無後顧之憂啫，市民要搵食要生活，唔得閒陪你哋癲o架，叮！
