佔中激起索償潮 找數應搵淫賤黎
正所謂，出得嚟行，預咗要還。有佔中搞手實牙實齒話會喺運動結束後自首，嗱，自己知自己事，係時候洗乾淨個八月十五嘞。法律責任佢哋固然吟詩吟唔甩，佔中搞到百業蕭條，民生凋敝，市民追討經濟損失嘅浪潮此起彼伏，分分鐘賠到褲穿窿呀。
唔係講笑o架，佔中阻住地球轉，直情天怒人怨，連日嚟有商戶同市民入稟小額錢債審裁處，向佔中發起人同壹傳媒老闆淫賤黎追討佔領行動造成嘅損失，截至目前已有十多宗索償個案，當中涵蓋旅行社、食肆老闆、超市、司機等多個行業。有團體近日喺旺角擺街站，了解商戶受佔中影響帶嚟嘅損失，以便日後提供法律支援，短短一日就收到近二百份問卷，照咁睇嚟，類似索償畸士肯定陸續有來。
聽吓班苦主點講啦。喺灣仔經營食肆嘅宋先生大吐苦水，佔中第一日已經有十一枱客取消預訂，即使要求員工放無薪假節省成本，損失都接近二十萬元，只不過告上法庭太麻煩，而小額錢債審裁處嘅最高追討額係五萬蚊，所以先索償住五萬咁解。
冇錯嘞，好多大機構畀佔中搞到雞毛鴨血，冇啖好食，有五星級酒店反映，淨係計啱啱過去嘅「十一」黃金周，每日就唔見六十萬。如果個個都對簿公堂，睇怕班搞手唔使佔中，直接佔領法庭得嘞。
佔中搞手講得冇錯，佔中破壞力真係好比核彈咁勁，即使你唔係上班族亦唔係老闆，一樣中招嘅咋。呢，有中西區家長因為佔中停課多日，入稟小額錢債審裁處，向學生組織追討學費同車費等損失。就連有份鼓吹佔中嘅白鴿黨民調都顯示，七成半受訪市民表示運動對佢哋有影響，亦即係話，受影響市民隨時超過五百萬，即使只有小部分索償，搞手們破十次產都唔掂啦。
講真吖，佔中到底蒸發幾多財富，相信冇人講得清楚，但肯定係天文數字。呢嗱，有學者估計佔中首星期經濟損失達三千五百億元，家陣兩個星期又過去嘞，以此類推，即係再唔見七千億，就算撇除佔中頭幾日係黃金周，五千億睇怕點都走唔甩喇啩。
打蛇打七寸，擒賊先擒王。計太一叮話齋，市民要追數梗係有大食大，集中火力搵佔中幕後黑手淫賤黎啦。反正佢搵嘅都係宣淫販賤、反中亂港嘅不義之財，都係時候一次過嘔凸咯，叮！
