美職帶領波衫掠水革命!雖然兩大球星韋拿同林柏特仲未正式登陸MLS,但美職周一宣布同西班牙公司Playing2合作,下季容許季票球迷將自己嘅相,印落愛隊嘅波衫號碼上,成為全球首個同球迷「並肩作戰」嘅足球聯賽,目的係吸引更多人為美職畀Like。

買件印有自己樣嘅波衫紀念吓都好。

根消息,美職嘅季票持有者可以喺2015年8月前,將自己嘅相片上載到心愛球隊官網,揀好0至9嘅數字後,就會有專人將唔同球迷嘅相,拼貼成為波衫冧巴,到時各隊球員喺8月期間嘅常規賽,都會着住特別版波衫出場,意思係同球迷一齊作戰。

米禾爾迷彩衫幫軍人籌款

雖然以往有墨西哥球隊,甚至皇家馬德里同馬德里體育會(下圖)都試過將球迷印上冧巴,並唔係石破天驚嘅事,但成個聯賽一齊搞,美職係全球首次,而且粉絲可以喺各隊嘅主場官方商店,買番有自己個樣嘅波衫,好可能有今生冇來世,應該會幾好賣。

英冠嘅米禾爾就以悼念戰爭死難者為名,決定推出第一次世界大戰爆發100周年紀念版波衫,迷彩設計勁靚,每件賣50鎊,當中20%收入捐去為軍人而設嘅海德利庭院康復中心,仲搵埋殘障軍人拍廣告,希望籌到2萬鎊,賺錢得嚟都算有業界良心。

拉素「老鷹」波衫鬥羅馬

至於意甲老牌球會拉素,就湊熱鬧出115周年「老鷹」球衣,用番80年代嘅經典圖案設計,懷舊迷一定勁鍾意。雖然話呢件波衫係要嚟下季用,但報道話明年1月嘅意大利首都打吡戰,拉素對羅馬會搶閘着呢款波衫出場,希望引誘更多球迷買新球衣。