又聞塌樹險殺人 都市炸彈何其多

前日之嘛，元朗馬棠路一棵廿米高細葉榕懷疑因為樹幹被腐蝕，一截枝幹突然向行人路坍塌，七名行人走避不及，被壓個正着，好彩枝幹首先壓向路邊交通燈，卸咗少少力，否則後果真係不堪設想。

話時話，近排塌樹好似會傳染咁，爆完一鑊又一鑊，都咪話唔邪門。呢，半山羅便臣道早排塌樹，一名孕婦被擊中身亡，釀成一屍兩命慘劇，話口未完，七日後鯉魚門公園又有巨樹倒塌，一名十二歲女童慘中頭獎，再加埋元朗呢單，唔夠兩個月發生三宗塌樹意外。成日話人衰行路打倒褪，其實一個地方衰起上嚟，一樣係怪事不絕，黑氣纏身嘅咋。

正所謂三分天災，七分人禍，樹木淪為都市殺手，歸根究柢都係因為港產官僚冇做好份工。就講半山塌樹慘劇吖，當局事後居然置身事外，話私人地方嘅樹木唔關佢事喎。唔該官老爺卸責都搵個好啲嘅藉口啦，照呢鋪講法，唔通私人物業嘅僭建招牌同消防隱患，政府就可以關人個關咯喎？仲有吖，民間一直要求訂立保護樹木嘅專門法例，當局睬你都傻，即使一再發生人命事故，仍然大玩拖字訣，話咩要謹慎研究喎。喂，人命關天呀，等到你研究完，唔知又多添幾個樹下亡魂啦。

當然啦，世不患無法，而患無必行之法。即使立咗樹木法，如果唔認真執行都係嘥氣嘅啫。有辦你睇，幾年前赤柱發生塌樹奪命意外後，當局係威係勢成立樹木辦，仲由時任政務司司長嘅唐唐掛帥統籌添，結果咪又係一事無成。第樣唔講，齋講保護古樹名木，當局係就係推出過名冊，弊在之後闊佬懶理，呢批古樹到依家病嘅病死嘅死，遲早絕種嘅咋。樹木管理烏龍百出，亂象叢生，連申訴專員公署都睇唔過眼，最近決定開快勞主動調查，問你服未。

老實講吖，香港遍地都市炸彈，又點止塌樹殺人咁簡單吖。唔係咩，搭升降機怕冧升降機，行街又怕冧招牌，簡直係一步一驚心。計太一叮話齋，再咁落去，唔使等佔中玩死香港人，淨係嚇都已經嚇死啦，叮！