消防官僚卸膊 反指傳媒偏頗

內地同胞經常為辦事不力、敷衍塞責嘅官僚贈送「最不作為」牌匾，認真夠創意。其實，天下烏鴉一般黑， 港產官僚亦唔好得去邊嘅咋，除咗「最不作為」，有啲人仲「最叻卸膊」添。呢，消防處有位高官就係人辦喇。

前年花園街四級大火造成九人死亡，消防處煞有介事調查一番，一查就查咗一年零三個月，點知最後竟然得個吉，連起火原因都一無所知。搞到死因裁判官忍無可忍，怒斥消防處嘅調查報告浪費紙張及法庭時間，企圖卸責畀市民。裁判官仲話，唔只今次係咁，消防處以往多次調查同樣搵唔到起火原因。你話喇，主管消防嘅部門居然唔知火從何來，係咪抵鬧吖。

本來呢，錯就要認，打就要企定，消防處混帳兼卸責，係無可否認嘅事實，只要衰衰地認錯，咪乜事都冇囉。點知有位叫吳建志嘅助理處長竟然死撐，話當日做法符合消防程序，並冇延誤救火救人。佢仲倒打一耙，指傳媒報道偏頗及負面，冇正面報道消防員奮不顧身救人，對此感到遺憾喎。

咁就真係好笑喇，玩卸責都唔可以賴得就賴o架。救火救人係消防處職責所在，做好本分理所當然，就好似報道事實係傳媒嘅職責一樣，有乜嘢好遺憾呢？傳媒只係如實報道裁判官嘅言論，有事實根據，冇添油加醋，咁又何來偏頗呢？

正如有人話齋，傳媒報道死因庭研訊內容係監察政府，係發揮第四權嘅職責，而死因庭嘅批評及建議亦只係想各部門精益求精，避免日後再出錯，公職人員連接受批評嘅胸襟及自我反省嘅勇氣都冇，點只令人遺憾，簡直令人失望添吖。再講喇，前線人員奮不顧身救火救人，雖然值得讚許，但亦唔表示部門無疏漏無出錯，況且公職人員履行職責亦唔應該為博取掌聲啫，係咪！

嗱，咪話太一叮踢爆，消防處畀裁判官批評，唔敢得罪法庭，只好指桑罵槐，藉傳媒過橋發洩怨氣。正所謂，冤有頭，債有主，如果呢位助理處長真係咁夠泡，不如直接向裁判官興師問罪吖，笨！

消防處官僚好嘅唔學，學埋內地官場嗰一套，一味諉過於人，死唔認錯，仲企圖干預新聞自由，簡直豈有此理。再咁落去，唔使五十年不變，消防處好快就可以改名叫「香港公安消防隊」喇，叮！