醫療產業雖摺埋 醫療爛攤待收拾

開講有話，同人唔同命，同遮唔同柄。周一嶽同高永文都係醫生，先後成為食衞局局長，但命運就好唔同喇。前者渾渾噩噩呃足八年人工，剛落台又翻閹做平機會主席，而後者就慘啦，淨係收拾前任留低嘅爛攤子都有排煩呀！

其中一個爛攤子就係所謂醫療產業。高永文表示，港府嘅政策方向已經調整，以後唔再強調醫療產業，將會鼓勵志願團體及學術機構發展私家醫院，吸引原本使用公營醫療服務嘅中產選擇私營醫療服務，減輕公立醫院負擔。

即係咁，累人累物嘅醫療產業終於摺埋，梗係好事喇。不過，醫療產業壽終正寢，唔代表醫療問題完全解決。大家都知，前朝政府中門大開，放任雙非孕婦來港產子，私家醫院為咗擴展服務，不斷向公立醫院挖角，現屆政府叫停雙非孕婦同醫療產業，勢必有唔少醫生由私家醫院回流公立醫院，搞到醫生可能要重新執位，盞搵嚟搞嘅咋。仲有吖，私家醫院冇咗雙非呢條財路，只好不斷加價補數，搞到收費愈來愈貴，再咁落去，點鼓勵中產使用呀？又點可能減輕公立醫院負擔呀？

高永文話喎，私家醫院計劃調高收費，可能係因為當局叫停雙非孕婦令佢哋少咗生意。唉，當年雙非孕婦蜂擁來港，私家醫院顧客盈門，不斷加價，家陣冇咗雙非客，佢哋同樣要加價，究竟有無譜o架？雖然話在商言商啫，但不可不知，私家醫院一來肩負救死扶傷重任，二來接受政府廉價批地，絕對唔係一盤普通生意，究竟收費點樣定，政府照理應該主動監察，點可以放任自流。

私家醫院黑箱作業，收費問題只係冰山一角嘅咋。本報多次揭發私家醫院亂象：發生醫療事故未必上報，應該提供畀市民嘅免費病床又無提供……因為港府無監無管，私家醫院逐漸變成唯利是圖嘅怪胎，向政府攞着數時就話自己係非牟利機構，向病人收費時就變成見錢開眼。當局早前成立專責小組，話要檢討同改善私家醫院嘅監管問題喎，你信唔信吖？

講到尾，周一鑊雖然拍屁股走人，佢留低嘅爛攤子仲有排搞，高永文想撥亂反正，叫停醫療產業只係第一步，跟住落嚟，仲有大把手尾要跟，例如改善公共醫療、監管私家醫院、增加前線人手等等，希望高醫生做好呢份工，唔好再令大家失望啦，叮！