擴建會展了無期 見財化水失良機

弊傢伙，香港又衰咗喇！世界經濟論壇公布本年度全球旅遊競爭力排行榜，香港比上年急跌三位，排第十五位，輸畀排第十位嘅宿敵新加坡成條街。主辦機構話喎，排名大跌係因為香港冇加強環境改善措施。

嗱，呢啲就叫一語中的嘞，環境唔改善，硬件跟唔上，有生意都做唔掂，排名點會唔跌吖。講到底都係因為港府嫌錢腥，對增加旅遊尤其係會展設施唔嗲唔吊。係人都知，商務旅客對旅遊業嘅貢獻舉足輕重，可惜本港會議展覽場地長期不足，變相趕客。好似會議展覽中心咁，第三期擴建工程提咗N咁多年，點知拖到依家仲未有定案，搞到展覽檔期經常爆滿，有生意都冇辦法接，過去幾年已經流失咗幾十單生意，你話港府係咪敗家吖。

業界人士話，會展可租用面積約九萬平方米，同廣州及上海等地嘅大型博覽館根本冇得揮。你話嘞，如果擴建工程係咁拖落去，繼續坐失良機，肥水遲早流晒去別人田都似。唔怪得連北大人都睇唔過眼，批評香港經濟轉型太慢，原有優勢開始落後咯，叮！

會展位處維港兩岸核心地段，香江美景盡收眼底，比起周邊其他城市嘅展覽場地，吸引力一啲都唔輸蝕。如果有效利用毗鄰空間，打造一個國際級嘅「會展城」，對外國商務旅客真係好有吸引力。弊在港產官僚不思進取，胡混度日，拖得就拖，第三期擴建工程議而不決，決而不行，一遇到反對聲音即縮沙，咪搞到有生意都接唔到囉。

話時話，港產官僚好似二世祖咁，一味食老本，蹉跎歲月，坐以待斃。查實，本港唔止旅遊競爭力唔掂，整體競爭力一樣每況愈下嘅咋。呢，中國城市競爭力研究會月前公布中國城市競爭力排行榜，香港雖然再度蟬聯榜首，但上海同北京嘅經濟總量已經超越本港，好多範疇後來居上，香港只係喺法治方面強少少咋。

沉舟側畔千帆過，病樹前頭萬木春。周邊城市一心一意拚經濟，發展一日千里，而香港就自甘沉淪，政府無能，政客無良，爭吵不休，內耗不斷，連擴建會展都拖拖拉拉，競爭力唔跌至奇。咪話太一叮唔提醒，新加坡、澳門嘅人均產值已經超過本港，廣東後來居上亦只係時間問題，香港隨時淪為中國二三流城市，甚至打回小漁村都唔出奇㗎，叮！