馬拉松熱情澎湃 體育館乏善足陳

生命在於運動，呢句話唔止用嚟形容人生o架，一個城市有無生命力往往亦反映喺體育運動嘅興衰。咁香港嘅生命力係興旺定衰殘呢？

解答前不如睇下一場運動盛事先啦。一年一度嘅渣打香港馬拉松尋日舉行，破紀錄有超過六萬五千人起步，盛況空前，其中香港選手姚潔貞同張庭欣仲為港爭光，分別勇奪半馬拉松同十公里挑戰賽嘅女子組冠軍，恭喜晒！

嗱，今年賽事嘅另一喜訊係撞正元宵佳節。蜜運男女接力締造歷史一刻，有準新人着住婚紗禮服跑畢十公里賽事，寓意結束十年愛情長跑。亦有男跑手一衝線就跪低，唔係求救而係求婚，最終贏得美人歸，亦恭喜晒！

馬拉松一片盛況，參賽者熱情澎湃，係咪就代表香港運動風氣凌厲呢？唔……不如又睇下賽道另一端嘅景象吖。部分參賽者跑咗頭幾公里已經上氣唔接下氣，有人緩步跑變緩步行，有人馬拉松變馬上鬆中途退出，更加有人懷疑邊跑邊用手機自拍而導致混亂，禍及其他跑手跌倒受傷之餘亦差啲釀成人踩人慘劇。有網民批評參賽者無認真對待賽事，長嘆一句：渣馬真係好有規模，但跑手質素仲有進步空間。

本港運動發展處於乜嘢境況，大家一目了然。太一叮對呢個狀況唔覺得奇怪，試諗下，一直無認真對待康體運動、質素仲有進步空間嘅何止係業餘跑手，嗰班返工等收工得過且過嘅業餘官僚，搞到康體設施長期嚴重不足，運動場體育館乏善足陳，市民點樣鍛煉體能呀？運動發展點樣興旺呀？香港點樣有生命力呀？

香港人對體育運動嘅熱情唔低o架，唔止渣馬萬人空巷，維港渡海泳一樣人山人海，而「牛下女車神」李慧詩一班體壇驕子屢創輝煌嘅傳奇故事更加牽動人心。如果食住個勢推廣體育運動，香港真係分分鐘成為「活力之都」o架。可惜吖，政府捉到鹿唔識脫角，唔止無大興土木增建體育設施，反而一度想將啟德體育城改建住宅，簡直係腦殘。

香港自詡國際之都，康體設施長期天殘地缺，講出去都羞家。咁講啦，內地黑心食品氾濫成災，中國遲早再變東亞病夫，香港都係五十步笑一百步o架咋，康體設施長期嚴重不足，香港生命力只會日漸萎縮。

康體設施大落後，空有熱情馬拉松。港產官僚快快急起直追啦，增建康體設施，如果下年馬拉松有港人勇奪「全馬」桂冠，你哋都面上有光啦，叮！