庫房水浸須還富 紓困長短應兼顧

悠悠萬事，民生為大。現屆政府首份財政預算案禮拜三出台，當局成日將「民生無小事」、「急市民所急」掛喺嘴邊，究竟係吹水唔抹嘴，定係牙齒當金使，睇吓預算案就知。

據消息透露，財政司司長曾俊華會喺預算案陳述新政府未來五年財政理念，強調全民共享經濟發展成果。所以咯喎，下年度政府經常性開支增長將會顯著高於經濟增長及通脹率，而非經常性開支方面，據講動作多多，使錢唔少，包括會向關愛基金注資近百億元等等。

即係咁，取之於民，用之於民，政府早就應該咁做喇。尤其係庫房財源廣進，豬籠入水，會計師行普遍預計，由於金融地產持續暢旺，政府開支減少，本年度財政盈餘可能高達六百億元，同鬍鬚曾當初估計三十四億赤字差天共地，喺咁嘅情況下，預算案更加要有所表示喇。

古人話，君子愛財，取之有道，亦要用之有道。咁大筆「意外之財」從天而降，正如有人話齋，政府肥到連襪都着唔落，市民梗係期待當局能夠還富於民，推出紓解民困措施喇。

呢，尋日又有多個政黨同團體去政府總部請願，要求預算案對各項民生訴求作出積極回應，包括推行全民退休保障、十五年免費教育等，亦有政黨要求預算案推出租金津貼及租金免稅措施，紓緩基層家庭租住私樓嘅負擔。訴求各異，但目標一致，就係要求政府還富於民。

話時話，市民嘅訴求一啲都唔過分，今時今日通脹肆虐，百物騰貴，基層市民收入增長永遠追唔上物價上升速度，導致貧富懸殊加劇，社會矛盾激化，人人怨氣沖天。早前發表嘅施政報告宏圖大計多，惠民措施少，被批評望梅止渴，畫餅充飢。家陣庫房浸到就快滿瀉，政府坐擁巨額財政盈餘，如果鬍鬚曾繼續做守財奴，預算案又放空炮冇料到，再次令市民失望，政府嘅民望只會繼續插水嘅咋，叮！

民意難違，有糖唔派等如政治自殺，今次預算案派糖睇怕走唔甩嘅喇，問題只係派得孤寒定派得豪爽，派得敷衍定派得周到啫。咪話太一叮唔提醒鬍鬚曾，除咗派糖呢啲例行公事之外，亦要有長遠嘅扶貧紓困計劃，如果又係求求其其，敷衍了事，咁就唔衰攞嚟衰喇，叮！