周一嶽為禍八年 新沙士不堪設想

十年話長唔長，話短亦唔短。呢個特衰政府十年流流長都醫唔番好本港公營醫療體系，簡直靠害呀！

十年前沙士爆發期間，公立醫院醫護人手不足問題浮現，事隔十年病情無好轉，反而仲不斷惡化添。就講急症室吖，○九至一二年間嘅人手流失率激增一倍至百分之五點九，醫生空缺超過一百個。重災區沙田威爾斯親王醫院人手更加比正常編制短缺三分一；伊利沙伯醫院亦係人手告急，有急症室病人輪候八小時先至獲診症。

十年流流長，沙士病毒隨時變咗種幾次啦，醫護荒問題居然十年如一日，唯一變化就係不斷惡化，咁嘅狀況點防疫呀？喂，新沙士最近喺沙特阿拉伯再殺一人，令全球感染個案增至十五宗，當中九人死亡，死亡率六成高過沙士。公立醫院作為防疫第一線，連守城官兵都唔夠，隨時畀病毒長驅直入，市民唔擔心就假。

「東方報業民意調查」顯示，大部分受訪者認為香港一旦爆發新沙士，公營醫療系統根本難以應付，四成七擔心重蹈沙士覆轍；兩成一指情況不堪設想；一成二預計公院潰不成軍。

調查亦顯示，公院醫護流血不止，三成七受訪者擔心人手緊張會影響服務；三成五認為資源肥上瘦下所致；一成九直指問題已成惡性循環，難以根治。

唉，周一嶽呀周一嶽，睇你搞到醫療體系幾咁亂七八糟！

十年醫護兩茫茫，周一鑊，自難忘。大家應該記得，周一鑊係點樣縮骨卸膊o架啦，○四年上任衞福局局長之後，即刻向前線醫護開刀，又減薪，又減福利，又減醫科生名額，搞到前線醫護士氣直插谷底，而工作壓力就飆升爆煲，點會唔爆逃亡潮吖？今日醫療系統病入膏肓，就係周一鑊為禍八年留低嘅大黑鑊！

公院長期人手嚴重不足，上述民調顯示，大部分受訪者直指周一鑊要負上責任，四成九直斥佢搞到問題積重難返；兩成四炮轟佢漠視問題；一成四直指佢係罪魁禍首。

其實，周一鑊嘅遺禍點止係醫護荒，直頭成個醫療體系都畀佢搞到烏煙瘴氣，單係醫療事故層出不窮已經害到病人雞毛鴨血。令人吹到啤一聲嘅係，港府居然仲翻閹呢件廢官，委任佢執掌平機會，你話係咪反智吖！

周一鑊，你呢隻官場大病毒要害人害物到幾時呀，叮！