去年鼠患勝前年 食署官患永沒完

開講有話,蛇鼠一窩,今年係蛇年,加上食環署依然蛇王當道,鼠患會唔會惡化o架?

答案睇嚟係肯定嘅。食環署公布最新鼠患指數,雖然舊年下半年降至百分之一點九,低於上半年嘅百分之二點九,但全年指數不跌反升,拉勻高達百分之二點四,高過前年嘅百分之一點七。至於全年分區指數三甲位置,就由元朗、九龍城同觀塘奪得。

鼠患指數一年勝過一年,你話新一年係咪都幾難唔蛇鼠一窩吖?難為食環署仲唔知醜,話本港公眾地方嘅鼠患情況大致受控喎,今年會繼續分兩階段推行全港滅鼠運動咁話。

過街老鼠前特首曾蔭權爵士擘大眼講大話,搞到貪腐惡名臭上加臭,食環署官僚居然好學唔學。全年鼠患指數惡化,咁都叫情況大致受控?小心甩晒啲大牙呀!粉飾鼠患等於助鼠為虐,食環署扮晒魚蝦蟹,究竟係掩飾自己無能,定係掩護鼠輩橫行呀?

鼠患愈嚟愈嚴重,食環署有咁嘅解釋:「主要由於區內個別地方及後巷的環境衞生欠佳,例如雜物堆積、不適當存放垃圾和食物殘渣等,為老鼠提供藏匿地方及食物。」無錯,呢啲都係原因,不過食環署刻意隱瞞一個最根本嘅禍源,就係廢官堆積。

喂,後巷嘅環境衞生唔係食環署負責嘅咩?如果你哋盡忠職守勤於執法,個別地方同後巷點有機會雜物堆積同不適當存放垃圾和食物殘渣呀?如果你哋緊守崗位辦事得力,啲鼠輩又點有得匿,點有得明目張膽四出搵食呀?唔好話你哋懶散兼低能,搞嚟搞去都殲滅唔到班鼠輩,反而畀佢哋愈嚟愈猖狂!

其實唔使睇參考指數都估到鼠患會惡化啦。早前有政黨收集義工舉報同市民投訴,發現全港衞生黑點多達百幾個,後巷淪為垃圾站,垃圾站變成垃圾崗,香港唔變老鼠樂園至奇啦。家陣新沙士同禽流感兵臨城下,鼠患加劇隨時「如虎添疫」,食環署簡直靠害市民!

講起唔知好驚定好笑,伊朗首都德黑蘭又係鼠患嚴重,當地政府束手無策之下惟有武裝滅鼠,十組狙擊隊荷槍實彈摸黑街頭殺敵。食環署放生鼠輩養癰為患,話唔定香港有朝一日亦會出現飛虎隊周街圍捕老鼠嘅滑稽場面!

鼠患惡化反映官患未除。以前食環署署長卓永興滅鼠放軟手腳,被人話同老鼠有親,家陣梁卓文一擔擔,唔通收咗鼠輩着數?嗱,梁卓文,如果你唔以行動闢謠,小心步貪曾後塵,畀人向廉署舉報呀,叮!

第一手消息請下載on.cc東方互動iPhone/iPad/Android/Windows Phone Apps