中港矛盾好頭痕 解鈴還須繫鈴人

一簽多行，仲行唔行？呢個問題搞到港府好頭痕，無他嘅，內地旅客急增，連奶粉都搶到幾乎斷市，搞到中港矛盾愈演愈烈，如果當局唔想問題繼續惡化，實在有必要檢討個人遊尤其係一簽多行政策。

嗱，唔講得笑o架，過去三年，個人遊旅客增長近十倍，如果情況持續落去，香港遲早陸沉，到時唔好話奶粉變成限制品，隨時連麵粉都要配給呀！

所以咯喎，一向後知後覺嘅港府今次唔敢怠慢，聲稱長遠必須調控內地旅客數目，而方法不外乎從簽證同入境人次兩方面入手。即係話，一簽多行遲早要檢討，就算唔取消，都要調整喇。

據深圳海關透露，現時約有兩萬人從事水貨活動，當中六成係港人，一日往返四次以上嘅有三百幾人，有人甚至一日往返二十六次添，單係舊年就檢控咗八千名水貨客，內地、港人各佔一半。

一日往返二十六次，唔怪得走水貨成為中港另類貿易啦！一年有八千個水貨客被檢控，唔怪得奶粉風波愈演愈烈啦！眾所周知，水貨客就係睇準一簽多行嘅漏洞，以螞蟻搬家模式走水貨，密食當三番，如果呢個漏洞唔堵塞，水貨活動禁之不絕，中港矛盾必然持續升溫，搞到我鬧你係蝗蟲，你罵我係狗，真係羞家！

咁講啦，個人遊推行十周年，有利亦有弊。當年沙士爆發，香港經濟陷入低谷，個人遊無錯為香港帶來及時雨，令經濟起死回生，但同時亦衍生各種問題，搞到孕婦爭床位，嬰兒爭奶粉，學生爭學位，中港矛盾唔惡化至奇啦。當斷不斷，必受其亂，檢討個人遊政策，優化一簽多行事在必行，港府已經避無可避嘅喇。

嗱，內地官員都開聲啦，話上海同樣面對外來人爭奪資源問題，搞到孕婦床位供不應求，不過總有辦法解決咁話。聽到未呀？只要思想不滑坡，辦法總比困難多，逃避唔係辦法嘅，正視問題，消除矛盾，咁先至係正路吖嘛。

講開又講，冤有頭，債有主，中港矛盾講到底係內地當局一手造成，如果神州大地唔係貪官橫行，奸商為禍，搞到毒奶氾濫，內地同胞又點會來港搶購奶粉呢？所以話，解鈴還須繫鈴人，要解決中港矛盾，始終要由內地做起。點樣做？好簡單啫，反腐敗囉，捉奸商囉，叮！