抗疫防線如虛設 沙士悲劇恐重演

沙士爆發十周年，當年慘況仲歷歷在目，令人心有餘悸，而更毒更攞命嘅新沙士又殺到埋身，你都咪話唔驚。

早前英國出現全球首宗新沙士人傳人死亡個案之後，陸續又有人中招。嗱，中東又添新亡魂，沙特阿拉伯向世界衞生組織通報一宗確診新型冠狀病毒感染死亡個案，令新沙士死者增至七人。外國研究發現，新沙士病毒複製能力仲高過沙士病毒，人傳人嘅可能性極高。港大微生物學系講座教授袁國勇就警告，新沙士死亡率高達五成，「可以好大鑊」。

更大鑊嘅係，新沙士威脅迫在眉睫，而本港抗疫防線形同虛設，惡菌隨時長驅直入，當年慘劇可能重演o架。係人都知，出入境口岸係第一道抗疫防線，點知呢啲地方基本上處於「不設防」狀態。本報記者直擊發現，各個出入境大堂基本上見唔到提防新沙士嘅告示，體溫檢查站亦得個樣，連抽查旅客體溫都慳番；有口岸檢疫櫃位甚至唔見人影，而體溫檢測儀根本冇開。唉，靠佢哋把關喎，蛇都死喇！

被視為抗疫第二道防線嘅公立醫院亦好唔得去邊。有醫院傳染病中心中門大開，部分醫護及勤雜人員連口罩都冇戴，電梯大堂消毒液機入面根本冇消毒液。最匪夷所思就係，當年最先接收沙士病人、最先被病毒攻陷嘅廣華醫院，同樣戒備鬆懈，毫無抗疫氣氛，地下大堂連消毒地氈都冇，醫院唔似醫院，問你服未。

仲有吖，當年沙士係由果子貍引起，依家廣東一帶食果子貍風氣再現，一個唔覺意，隨時災禍重臨嘅咋。

正所謂，前車之覆，後車之鑑，港產官僚防疫懶懶閒，一旦惡菌重臨，勢必潰不成軍。當年沙士襲港，就係因為港府麻痹大意，官僚後知後覺，時任衞生福利及食物局局長楊永強齋噏當秘笈，一句「冇肺炎爆發」，令市民疏於防備，導致疫潮一發不可收拾，結果搞到一鑊泡，除咗造成近三百人死亡，更令本港成為臭名遠播、旅客敬而遠之嘅疫埠，幾乎萬劫不復。

千里之堤，毀於蟻穴，抗疫漏洞唔堵塞，勢必鑄成大錯。新沙士兵臨城下，如果當局唔吸取當年慘痛教訓，繼續闊佬懶理，抗疫防線隨時失守，你班港產官僚唔只對唔住七百萬港人，更對唔住當年以身殉職嘅抗疫勇士吖，叮！