勒邦占士夜蒲鎅女斷正

「大帝」婚禮臨門撻Q？計劃今年9月做老襯嘅勒邦占士（LeBron James），已經幾個禮拜冇同未婚妻莎雲娜（Savannah Brinson）齊齊亮相公開場合，呢「兩公婆」喺全明星周末期間各有各玩不特止，美媒尋日仲踢爆「大帝」搭上一位神秘金髮女郎，同莎雲娜似乎緣已盡喇！

熱火上個月造訪白宮會見美國總統奧巴馬，個個球員都攜眷出席，唯獨占士就一支公到場，當時已經惹嚟美媒議論紛紛。《MediaTakeOut》尋日刮到猛料，踢爆莎雲娜上個禮拜冇出席全明星周末捧「大帝」場，反而同班Friends去咗加州卡塔利娜島度假，至於占士就被目擊喺休斯敦一間夜店攬住位金髮索女Happy，呢位神秘女郎仲將占士嘅冠軍指環戴上手玩自拍，咁貴重嘅嘢都攞得嚟玩，證明佢同「大帝」嘅關係非比尋常啦！

雖然感情生活成為傳媒焦點，不過勒邦占士出晒名夠專業，尋日繼續交足貨，攻入全場最高嘅26分，帶領熱火作客以86:67大炒公牛，錄得9連勝佳績，個勢猛成咁，聽朝乘勇造訪76人當然可以繼續秤先，熱火讓5.5分，一於追多次上盤啦！