捉鹿唔識脫角 古蹟門可羅雀

大家知唔知大埔有個極具保育價值，全國碩果僅存嘅法定古蹟，而呢個法定古蹟已改為展館？相信冇幾多個人知道答案。嗱，呢個法定古蹟咪就係大埔碗窯展館囉，未聽過呢？

唔講唔知，大埔碗窯係本港唯一出土嘅青花瓷古工廠，由明代中葉一直做到上世紀三十年代，係中國唯一保存完整製碗工序嘅遺迹。港府廿幾年前將佢列為法定古蹟，後來仲使咗近百萬元改建為展館，話要保育喎。

即係咁，保育古蹟天經地義，冇人話唔啱，問題係展館啟用兩年來一直拍烏蠅，用門可羅雀形容一啲都唔過分。點解會咁？講起就好笑咯，呢個展館曾被踢爆「塵封三年」遲遲未開放，後來又靜靜雞開館，連開幕式都慳番，搞到神不知鬼不覺，又點會有人參觀吖。

更好笑嘅係，當局好似唔想畀人知古蹟嘅位置，由大埔東鐵站出發步行二十分鐘，沿途居然睇唔到任何展館指示牌。喂，呢個係公帑改建嘅展館，參觀人數梗係多多益善喇，你以為係張保仔藏寶洞，愈密實愈好咩，叮！

開館鬼祟，又冇指示牌，唔拍烏蠅至奇喇。呢嗱，展館開放兩年幾，入場人數只有約一萬五千人次，平均每日廿人參觀咁大把，而且多數係團體客，好明顯係宣傳不足喇。庸官暴殄天物，古蹟淪為擺設，簡直係浪費公帑。

古蹟辦回覆本報查詢時仲死撐，話舊年喺中環天星碼頭同國際機場等地點，曾經做過「古蹟大發現」巡迴展覽，介紹包括大埔碗窯在內多處古蹟喎。咪話太一叮踢爆吖，呢類所謂宣傳無非戙幾塊廣告板係咁意介紹一下，有幾多人會留意吖。再講，沿途連指示牌都冇，咪又係嘥氣。

沉香當廢柴，古蹟當擺設，係港產官僚嘅通病。呢，東平洲升呢為世界級地質公園，吸引唔少遊客周末假日登島一睹地質奇觀。弊在當局墨守成規，島上士多申請經營食肆遲遲攞唔到牌，遊客捱飢抵渴，乘興而去，落荒而逃，世界級景點卒之變成世界級笑柄。

講番保育呢筆，當局政策混亂，進退失據，辦事拖拉，唔少被列入歷史建築名冊嘅建築物喺等候評級期間被拆卸或改建，反而不倫不類嘅舊政府總部西座無端端獲得保留，你話係咪得啖笑吖。唉，靠呢班捉到鹿唔識脫角嘅庸官搞保育，香港啲文物古蹟遲早變晒廢墟嘅咋，叮！