洋垃圾為禍 官垃圾靠害

負責處理垃圾嘅官僚，大可稱之為垃圾官僚，咁收留垃圾嘅港口，又應該叫乜呢？當然係垃圾港喇。

唔係嚇大家o架，香港真係隨時變垃圾港。事情係咁嘅，由於垃圾有價，回收商一向收集俗稱「洋垃圾」嘅外國棄置衣物同塑膠等物資，經香港轉口內地牟利。可惜今時不同往日，內地基於衞生考慮，近年唔再准許洋垃圾入口，搞到大量洋垃圾滯留香港，有入無出，愈積愈多，認真大鑊。

咁又難怪嘅，今時今日內地同胞大把錢，名牌舶來品就話多人要啫，垃圾舶來品有人要至奇。洋垃圾變真垃圾，回收商梗係棄之哉啦，如果商人守法都好少少，將洋垃圾送去堆填區，最多增加堆填區壓力啫，但如果撞正利字當頭嘅違法分子咯喎，咁就頭痛喇，新界鄉郊同垃圾站隨時淪為免費堆填區。

呢嗱，本報記者直擊呢種垃圾行為，真係令人不忍卒睹。古洞嘉龍路一個毫不起眼嘅垃圾站，已經變咗洋垃圾回收商嘅私人堆填區嘞，舊衫舊鞋堆積如山，甚至丟晒出路邊，唔止有礙觀瞻，更加影響衞生。堆填區逼爆，鄉郊倒垃圾，垃圾站變垃圾崗，搞到烏煙瘴氣，七國咁亂，你話香港係咪遲早變垃圾港吖，叮！

有乜辦法防止垃圾港噩夢成真？咁就要問垃圾官僚嘞。環保團體係咁講嘅，造成今日呢個局面，當局亦有責任，一來法例粗疏，無機制攔截打回頭嘅洋垃圾；二來把關不力，任由洋垃圾當本地垃圾隨意送入堆填區。簡單嚟講，即係由於港府係官場廢料收集站，所以香港就淪為全球廢料收集站囉，你話垃圾官僚係咪靠害吖。

自己知自己事，港產官僚對垃圾處理一事無成，焚化爐建唔成，堆填區瀕臨爆棚，連源頭減廢都搞到唔湯唔水，如果再加埋洋垃圾，香港實谷爆o架！

唉，你話港產官僚邊有帶個心返工o架。內地拒收洋垃圾唔係一朝一夕嘅事，當局居然一直懶懶閒無諗過點樣善後，呢頭猛呻堆填區就嚟爆滿，嗰頭任由洋垃圾長驅直入，咁嘅廢柴表現真係好垃圾囉。

總而言之，洋垃圾為禍，官垃圾靠害。香港會唔會變臭港，唔止係一字之差，更在於當局一念之間，垃圾官僚如果唔想變成真正垃圾，速速做嘢喇，叮！