前呼後擁陪貪曾 國產官僚真犯賤

咦，過氣特首曾蔭權爵士「升呢」喎。大家唔好誤會吖，國家領導人嘅職位佢恨唔到，只係遊山玩水擺威風嘅腐敗作風提升到內地層次啫，咁都算貪腐國家化，賤到上神枱吖，叮！

嗱，貪曾嘅遊樂路線圖真係遍神州o架，繼早前去廣東辦年貨同遊玩之後，近日又被網民發現佢玩轉江蘇省高淳老街，而且又係勞師動眾，前呼後擁。喂，貪曾已經唔係特首，更加食檸檬做唔成國家領導人，家陣嘅身份就係一名正接受廉署調查、臭名遠播嘅退休貪官，國產官僚將佢奉為上賓，無事獻殷勤，簡直就係對中央反貪嘅最大諷刺喇！

更諷刺嘅係，今次跨省遊樂團嘅團友唔止包括貪曾夫婦同高淳縣領導，居然仲有廣東省港澳辦同接待辦官員。有無搞錯呀？貪曾逍遙快活遊江蘇，最多係當地政府接待啫，關廣東省官員乜嘢事呀？唔通呢啲就叫粵港一家親，香港貪官同廣東官僚有福同享，有旅遊齊齊玩？

中共第五代掀起反腐風暴，又話厲行節約，又話唔可以鋪張浪費，講到官員連收花都唔准。點知言猶在耳，地方官僚以接待香港退休舊電池嘅名義，乘機遊山玩水，浪費公帑，咁咪即係同中央唱反調？貪曾「貪盡省港澳，歎盡海陸空」，搞到聲名狼藉，家陣廣東官僚「貪到上江蘇，傍住貪曾玩」，正如有人話齋，簡直犯賤！

好笑嘅係，國產官僚擦鞋都揀對象吖。貪曾唔止出名係香港第一貪，更加係政治無間道，係一個英國爵士，國產官僚敵友不分，睇嚟唔只貪腐作風同貪曾不相伯仲，政治上同貪曾都係沆瀣一氣！

更好笑嘅係，貪曾接受內地雜誌專訪時竟然自爆，曾由專家陪同乘坐特殊船隻到普通市民不准進入嘅香港濕地禁區拍攝黑臉琵鷺，你話係咪無法無天吖。

都係車公支籤夠靈，「何為邪鬼何為神，神鬼如何兩不分。」國產官僚神鬼不分，忠奸不辨，國家點會太平，吏治點會清明呢？唉，其實都唔怪得晒地方官員，中央自己立下壞榜樣，當日搵一位英國爵士做香港特首，下面嘅官僚奉貪曾係上賓又有乜出奇吖，都係有樣學樣嘅啫。

計太一叮話齋，北大人要反貪，烏蠅固然要打，貪曾呢隻大老虎更加要打，只要香港廉政公署速速做嘢，將貪官繩之以法，至少可以警惕內地貪官吖。所以話啫，法律制裁貪官不但有益於香港，同時亦有功於國家。廉署仲等乜嘢吖，叮！