黑心食品揭不盡 胡混十年禍無窮

古時有五胡亂華，係中國最黑暗時期，今日有五毒亂華，又係發生喺中華民族最敗壞嘅年代，唔知官版歷史教科書會唔會記下呢恥辱一頁呢？

嗱，五毒就係深圳私宰病死豬、湖南重金屬大米、福建農藥超標茶葉、上海豬屍臭水，同埋瀋陽致癌激素雞。排名不分毒性，事關樣樣咁毒咁恐怖，為黑心食品攻陷中華大地寫下新註腳！

係咪好諷刺呢？北京「兩會」啱啱至變身黑心食品化驗場，有身兼全國人大代表嘅村官即場展出乜嘢係甩色黑皮花生、染色開心果、王八蛋雞蛋精。言猶在耳，內地又爆出食品安全問題，只係今次親身驗毒嘅唔係一位義憤填膺嘅村官，而係千千萬萬異物填肚嘅無辜百姓。

當然啦，內地黑心食品氾濫成災遍地開花，肆虐嘅點只五個省市，花款又點只五毒吖。另一位人大代表、中國工程院院士鍾南山踢爆，家陣內地每年產生地溝油七百萬至一千四百萬噸，其中三百五十萬噸地溝油回流餐桌，好多人食咗都唔知乜嘢事。喂，五胡亂華饑民餓極烹兒慘絕人寰，今日中華民族互相餵毒自相殘殺，都係一樣咁黑暗，一樣咁可悲o架咋！

無論邊個朝代，邊個民族，新鮮空氣同清潔嘅食物及水源，都係人類基本生存條件。家陣中國人連吸啖空氣都怕患癌，食啖白飯飲啖水都驚中毒，GDP增長年年第一又有何意義呀？咁叫「黃金十年」？對貪官奸商就係，對無啖好食、無啖可食嘅老百姓嚟講，係「災難十年」就真！

唉，廟堂昏沉，世道紛亂，「胡溫十年」根本就係「胡混十年」。無錯，中國十年來發展迅速，經濟總量躍居世界第二，但發展更迅速嘅係黑心食品、環境污染、貪腐歪風、官民對立、貧富懸殊、癌病村、愛滋村、「被神經病」人……簡直數都數唔晒。當然啦，講到貪腐公僕嘅陣容之大，更加係長年穩佔世界第一！

講到呢度，大家難免要問，胡混十年神州滿目瘡痍，邊個要負責呢？邊個係罪人呢？嗱嗱嗱，過幾日中南海就權力交接嘞，乜嘢官場影帝，乜嘢政治老人，全部鞠個躬、拍吓個屁股，就笑騎騎走人，可憐係神州大地八千里錦繡山河，已經畀佢哋搞成只剩下一片殘山剩水，受害嘅就係往後世世代代嘅中國人。

知我罪我，其惟春秋，歷史從來不缺席，史書會記下中國呢個敗壞時代，亦會記下造成呢個局面嘅罪人，叮！