食署敗家霸靚地 寸土必爭大隻講

開講有話，只要精神不滑坡，辦法總比困難多。一切事在人為，只要肯動腦筋，冇話解決唔到問題嘅。就以房屋問題嚟講吖，市民要求增加供應，港府就問「地從何來」，好似好無奈咁，其實香港唔係冇地，而係港產官僚得過且過，根本冇認真諗辦法解決。

呢嗱，《好報》調查發現，食環署轄下二十五個佔用珍貴地皮嘅熟食市場，殘殘舊舊，唔淨止未能地盡其用，仲由於營運及管理不善，導致十室九空，年年虧蝕逾億元公帑。眾所周知，呢啲熟食市場多數設喺舊工業區，由於本港經濟轉型，工業北移，唔少工業區轉作商業或者住宅用途，熟食市場已經冇乜存在價值，點解當局唔改變用途，善用土地資源呢？

正如有人話齋，熟食市場佔用市區優質地皮，而且多數設有露天停車場，喺市區靚地買少見少嘅情況下，更加顯得珍貴。有人計過數，如果將呢啲熟食市場連同停車場一併發展，可以提供數以萬計房屋單位，一來滿足大批市民嘅置業需求，二來唔使食環署年年虧蝕，一家便宜幾家着，何樂而不為？咁簡單嘅道理，食環署居然闊佬懶理，寧願霸佔靚地丟空，白白浪費納稅人金錢，你話係咪敗家吖！

講到敗家，又點只食環署吖，根本成個政府都係咁。本港有七十幾幅私人會所用地由政府以象徵式租金批出，唔少只限會員使用，淪為富豪俱樂部，普通市民只能望門興嘆。如果話呢啲係港英政府留落嚟嘅特權，咁都冇話好說，但最奇怪嘅係，其中五十幾幅租約前排到期，喺土地資源咁緊張嘅情況下，當局無意收回呢批地皮不特止，仲打算續約十五年。大家話喇，當局究竟係急市民所急，定係急富豪所急？唔通富豪玩樂仲緊要過解決無殼蝸牛居住問題？

所以話，港產官僚一向嫌貧愛富，倒行逆施。呢，浸會大學一直爭取將九龍塘前李惠利校址用作教育，但港府就闊佬懶理，一於將該地皮納入土地儲備表作住宅用途，搞到學校發起一人一信抗議，仲話唔排除發起更激烈行動添。當局本末倒置，點起火頭，簡直唔衰攞嚟衰。

講到底，香港唔係冇地，「地從何來」亦唔係問題，問題在於港府既冇決心更冇魄力。當局口口聲聲寸土必爭，見縫插針，其實計太一叮話齋，旨意呢班渾渾噩噩嘅官僚解決房屋問題，睇怕又係希望愈大，失望愈大嘅喇，叮！