醫療系統周身病 有錢未必好辦事

人要病向淺中醫，公共醫療系統周身唔妥又點算呢？最好梗係對症下藥根除病源啦，弊在主診官僚醫術低劣不知所措，最多只有呢帖藥方：病向錢中醫！

大家睇下港府做唔做得到吖嗱。預算案尋日發表，新一個財政年度嘅醫療衞生經常開支聽落唔少o架，話會增加二十七億元達到四百九十億元喎。其中二百五十億元用嚟重建瑪麗、廣華同聯合三間醫院，二百億元改善公立醫院設施，包括增加二百九十張急症病床及康復病床。表面上醫療開支增加咗，係咪就代表港府急市民所急，醫療系統錢到病除呢？

梗唔係啦，瑪麗醫院同廣華醫院設備殘舊甩皮甩骨，一間手術室設計簡陋到連第三世界都不如，一間嘅年歲更加步入風燭殘年危險期，早就應該重建啦，港府家陣只係補鑊咋。至於增加二百幾張病床，相對全港公立醫院長年逼爆嘅告急狀態，更加係杯水車薪，睇嚟公共醫療系統嘅病情都幾難好得番咯，叮！

有錢使得鬼推磨？未必o架。港府窮到只剩下錢，未來幾年財政儲備仲高達八千億元添，但係公共醫療資源居然左支右絀，唔係醫院殘舊，就係病床唔夠，講出嚟都丟架。其實，隨住人口老化同醫療需求不斷增加，醫療開支年年遞增已經係意料中事，問題係，開支年年遞增，點解公共醫療系統仲係醫極都醫唔好呢？點解醫療亂象仲係鑊鑊新鮮鑊鑊甘呢？

原因好簡單，公共醫療問題多多百病叢生，歸根究柢就係醫管局管理不善又資源錯配。唔係咩？港府醫療開支年年增加，醫管局落袋嘅撥款亦由二十年前嘅七十幾億元增加到家陣嘅超過四百億元，增幅唔細，但係當中有幾多資源落喺病人身上呀？有幾多公帑用喺改善前線醫護人員待遇呀？如果醫療開支年年增加，最終受惠嘅唔係病人，而係醫管局高層，就算增加幾多開支都係等於掟錢落鹹水海o架咋！

難怪有人話，醫管局肥上瘦下管理不善，已經成為公共醫療系統嘅癌症。家陣公立醫院周身唔妥，服務質素下降，病人輪症鬥命長，醫療事故層出不窮，前線人手長期不足……咁搞法，醫療系統未病死，病人都隨時被害到雞毛鴨血啦！

醫療開支年年加，醫療亂象日日新。咁講啦，要搶救醫療系統，既要病向錢中醫，更要對症下藥。唔好再拖嘞，港府唔好以為增加咗醫療開支就當交咗差，快快履行監管之責，根治醫管局呢個惡瘤，叮！