活化河道又爛尾 貪曾禍水滾滾來

前特首曾蔭權爵士講過，希望離任之後，香港人會好快忘記佢喎。對於一個「痛心特首」，市民梗係唔想成日記住發噩夢啦，不過要忘記貪曾實在係一件天大難事，事關佢嘅屁股係就係離開咗特首張椅，但佢留底嘅蘇州屎實在太多，爆完一件又一件，篤眼篤鼻，市民點可以忘記佢吖！

其中一個爛攤子就係十億元活化屯門河工程。講起呢個工程，屯門居民火都嚟埋，本來工程美輪美奐潛力無限，結果河中撈月一場空，就係拜窩囊政府所賜。

件事係咁，貪曾○七年突然心血來潮，喺施政報告宣布活化屯門河，按計劃河兩岸將會打造成動態地帶，有多用途水上活動中心，又有漂浮餐廳，畀遊客一邊享受日落美景，一邊品嘗各式美饌。如果大計成真，屯門河一帶真係經濟活水滾滾來o架。可惜吖，○九年金融海嘯捲至，活化工程一嘢就沖散晒，喺官老爺縮皮政策之下只剩低一個活化天后廟廣場工程同一條連接兩岸的特色行人橋幸存。

工程大幅縮水都算，貪曾政府仲要縮骨，原定舊年上半年動工嘅行人橋工程，因為設計拖拖拉拉，工程延至舊年九月至招標，搞到工程費用超支一倍至八千六百萬元。當局家陣話喎，一係由屯門區議會補貼，一係修改大橋設計。咁即係話，如果區議會唔肯就範，工程極有可能草草了事，甚至爛尾收場。區議員炮轟前朝政府做事虎頭蛇尾，活化工程雷大雨小！

你話貪曾政府幾咁窩囊吖？好好一個活化河道計劃，居然搞到面臨爛尾危機。本來呢，活化屯門河既可以美化地區，又可以帶動經濟，對居民真係好事嚟o架，點知一場歡喜一場空。無計啦，貪曾靠得住，豬乸會上樹，貪曾胡混度日，前朝政府帶畀市民嘅集體回憶，除咗失望，亦係失望。

都係嗰句啦，貪曾在位七年只係掛住傍實富豪黐飲黐食嘅啫，邊有閒情逸致關顧民生吖。嗱，活化屯門河爛尾，十大基建爛尾，六大「慘業」爛尾，新界東北發展計劃亦瀕臨爛尾。你話嘞，香港係咪已經變咗一個左穿右爛嘅爛攤子吖！

諗諗下，香港又叫香江，其實命運同屯門河差唔多。香港庫房水頭充足，本來有潛力發展得生意盎然，可惜喺歷屆政府蹉跎歲月，施政唔係呢樣爛尾，就係嗰樣爛尾，結果社會烏煙瘴氣，香港幾乎變臭渠。

活化河道又爛尾，貪曾禍水滾滾來。廉署查貪曾唔好爛尾呀，一定要將佢繩之以法，否則點對得住香港人呀，叮！