一條龍面臨斷龍 教育局玩殘學生

港產官僚話過，求學唔係求分數。呢句說話嘅可信度同煲呔曾爵士話「我要廉潔奉公」差唔多嘅咋，你試吓考試成績差少少，想入名校都幾難，就算你讀緊「一條龍」學校，一樣冇得傾。

教育局建議日後升中派位，取消現行「一條龍」中學必須全面接收其連繫小學小六生嘅做法，學校有權要求成績欠佳小六生留級，甚至拒絕直升中一。換言之，「一條龍」學校面臨「斷龍」，估計每年至少有二千名升中學生受影響，搞到家長無所適從，直斥當局本末倒置，搵嘢嚟搞。

無錯，「一條龍」政策係港府十年前搞出來嘅，中學必須錄取其連繫小學所有選擇直升中學嘅小六畢業生，成績差嘅都要焗住收。呢種辦學模式頗具爭議，有人話對外校學生唔公平，有人話可以減少考試壓力，至於有機會就讀「一條龍」學校嘅同學梗係歡迎啦，起碼唔使搵中學咁麻煩，家陣當局一聲斷龍，當堂打破學生直升夢，唔徬徨就假。

教育局朝令夕改，直頭係擾民。正如有家長團體話齋，安排子女入讀「一條龍」學校，目的係希望子女完成小學後直升連繫中學，毋須冒險，家陣准許「一條龍」中學拒收成績欠佳小六生，變相取消安全網，為學生製造雙重關卡，亦為家長製造恐慌。

即係咁，改變一條龍制度，無疑可以提升收生水平，降低學生嘅學習能力差異，同時亦可以體現公平原則，唔使畀人批評對外校學生唔公平。問題係，究竟乜嘢成績需要留級？邊個決定學生留級？學校同家長都一無所知，教育局唔搞清楚呢啲問題，盞引發爭拗搞到天下大亂嘅咋。

話時話，本港教育問題多多，唔公平嘅又點只「一條龍」制度吖。例如官津名校採取世襲制，剝奪其他學生入讀心儀學校嘅機會；又如達官貴人送子女到海外讀中學，成績差嘅都可以入讀本港大學。本來呢，成績面前，人人平等，官津名校世襲制及大學留位畀留洋生，唔係揀學生成績，而係揀學生嘅家庭背景，結果權貴子女世世代代入讀名校，而貧窮子弟只能望門興嘆，咁樣叫公平咩？咁樣叫有教無類咩？

仲有喎，近年傳統名校紛紛轉為直資學校，一邊接受公帑資助，一邊收取昂貴學費，變相將貧窮子弟拒諸門外。

講到尾，教育制度唔公平，係社會最大嘅不公平。如果當局拆散「一條龍」係為咗顯示公平，咁唔該同時檢討其他不公平嘅制度，否則，都幾難改變跨代貧窮，叮！