不切官僚腫瘤 難救醫療家醜

聖經記載，耶穌用五餅二魚餵飽五千人。太一叮懷疑，醫管局班官僚神棍梗係以為自己都擁有呢項特異功能嘞，如果唔係，又點會離譜到只係用三個醫生嚟應付幾百個病人吖！

沙田威爾斯親王醫院急症室嘅醫護人手短缺問題嚴重到嚇死人，尋日朝早居然只得兩名急症專科同一名駐院醫生當值。人手唔到正常編制嘅一半，如果服務咁都無受影響，除非真係有神迹啦！

醫護荒家醜外揚，皆因有前線醫護壓力爆煲之下將當值更表上載社交網站，呼籲醫生同業江湖救「急」做兼職。醫院員工聲淚俱下字字淒酸：「我哋好無助，睇住病人入嚟，但睇（診治）唔到佢，甚至睇住佢死。」

幾年前爆出公立醫院對病人見死不救醜聞，已經夠晒可惡，如果日後急症室爆出對病人見死無人手去救嘅醜聞，咁就更加可悲。大家咪以為唔會發生呀，威院急症室早前至發生一宗悲劇，一位九十八歲老婆婆因為間歇性嘔吐而求診，通宵苦等十個鐘至見到醫生，結果由神志清醒等到神志不清，由嘔水等到嘔血，最後來不及藥到病除已經返魂無術。

唉，睇住病人入嚟，但幫唔到佢，結果睇住佢死。今時今日，呢種港式悲劇隨時會喺任何一間公立醫院發生，叮！

點樣可以防止悲劇重演呢？嗱，咁就要問當局嘞。醫護荒嘅裂口幾時至填補到呀？醫護流失嘅傷口幾時至止到血呀？你哋班官僚神棍幾時至唔再渾渾噩噩詐傻扮懵呀？見到棺材都唔流眼淚，醫管局話解決前線醫護不足問題，大大話話都講咗幾年，但係問題無改善，反而不斷惡化，唔通真係要再次搞出人命，你哋先至知驚？唔通真係要醫療系統亦等到一命嗚呼，你哋先至會緊張？

要官老爺洗心革面，睇嚟真係要有神迹至得。威院前線醫護踢爆，多次向當局反映急症室人手嚴重短缺問題，可惜意見無被正視不特止，醫管局仲對外聲稱威院人手無問題，擺明篤數瞞騙公眾。醫學界立法會議員直斥，醫護荒遲遲未能解決，事件屬行政問題多於人手問題。

一語中的，醫護人手長期短缺，醫療亂象禁之不絕，病源就喺呢班行政官僚身上。事實擺在眼前，家陣亟待搶救嘅唔止係威院急症室，仲有醫管局。港府如果唔想民望失救，就唔好再拖啦，快啲同醫管局做個全身檢查，然後手起刀落切除官僚腫瘤，叮！