官僚懶理光污染 原來港府是元兇

香港號稱東方之珠，唔係吹水o架。五光十色嘅燈光，繁華璀璨嘅夜景，令香港聞名於世，亦成為吸引旅客嘅最大賣點。之不過咁，有利就有弊，當璀璨夜景成為影響港人生活嘅光污染，咁就過猶不及喇。

呢，香港大學研究發現，香港成為全球光污染最嚴重嘅地方之一，即使喺濕地公園等偏遠嘅地區，夜晚錄得嘅光度亦比國際標準高一百倍以上，至於重災區尖沙咀太空館咯喎，光度更加超標一千倍以上，你都咪話唔誇張。

唔怪得港產官僚對光污染闊佬懶理，遲遲唔肯立例規管啦，原來港府根本就係光污染嘅元兇。太一叮有時諗極都唔明，太空館使唔使用咁強勁嘅燈光吖？唔通想吸引外星人咩！

係人都知，光污染唔只浪費能源，破壞環境，仲嚴重擾民添。港府無監無管，搞到霓虹招牌愈來愈多，已經由油尖旺等傳統鬧市蔓延到港九新界各區，唔少居民被迫晚晚觀賞「燈光匯演」，煩不勝煩。玄學家話呢啲叫光煞，影響運程及健康，後果可大可小o架。而醫生就指廣告燈箱大多採用LED技術，燈光每秒鐘閃動百幾次，人類長期暴露於高頻閃燈下，會擾亂生理時鐘，導致失眠、疲勞，甚至誘發腦癇症，問你怕未。

居民寢食難安，官僚一於懶理。本報曾經揭發，對於鄰近民居嘅招牌安裝申請，屋宇署完全唔考慮負面影響，一律照批；房屋署前年喺梨木樹球場附近興建升降機，明明日頭先至開工，竟然晚晚燈火通明，你話係咪嘥電擾民害地球吖！

港產官僚話喎，之所以唔立例規管光污染，係怕影響商業活動同香港旅遊業嘅吸引力。其實呢啲只不過係狡辯，只要政府規劃得當，整治光害唔只唔會影響旅遊業，仲可以提高香港國際形象。好似南韓首爾咁吖，政府立例將光度上限定為幾個水平，商業區鬆啲，住宅區嚴啲，郊區就再嚴啲，而所有霓虹招牌必須喺十二點後熄燈，結果唔只無影響旅遊業，仲大大提升城市形象添。南韓政府做得到，港府做唔到，講到尾都係無心嘅啫。

呢嗱，環境局局長黃錦星承諾年中提出建議管制光污染，希望唔係得把口啦。前朝政府整治光污染不力，貪曾自己仲淪為「氣候逃犯」添，有市民忍無可忍，曾經用一千二百火嘅超強大光燈射入禮賓府抗議，如果新政府又係大隻講，隨時有人再發出通緝令o架，叮！