弱勢政府萬事難 填海造地舉步艱

香港地，最缺地，搵地建屋成為頭號難題。港府為咗解決呢個難題，不惜重彈舊調，建議維港以外填海及發展岩洞，第二階段諮詢方案尋日終於出爐嘞。

根據當局建議，五個填海選址包括屯門龍鼓灘、沙田馬料水、青衣西南，同埋大嶼山嘅小濠灣同欣澳。當局話喎，五個填海選址總面積六百公頃，最快一九年至二○年可以提供首塊填海土地咁話。

俗語話移山填海，填海造地本來係好事，但對香港嚟講，填海最難唔係移山，而係擺平環保團體及社會人士嘅反對聲音，政府有乜板斧呢？官老爺話喎，五個選址已經剔除高生態價值地點，而填海前亦會進行模擬測試同聲納探測，了解對中華白海豚嘅生態影響。當局又話，暫時未能估算填海工程嘅總費用，但係成本一定低過市區收地重建喎。

即係咁，填海成本係咪低過市區重建唔知，但係呢個無中生有嘅造地工程會為社會帶來極大爭議，令港府付出巨大代價，就係意料中事。嗱，環保團體表明反對填海，指現時本港水域只剩低一百條中華白海豚，填海點都會破壞海豚生態，要求港府先採取其他方法增加土地供應，最後先至打填海主意。唔使問阿桂，港府填海大計好事多磨，阻力重重，隨時又係無米粥嘅咋！

都係嗰句啦，港府弱勢，動輒得咎，連喺新界起個焚化爐咁簡單都做唔到，家陣想開天闢地喺維港以外填海造地，談何容易吖。咪話太一叮睇死，填海諮詢隨時爛尾收場，變咗諮詢再諮詢，研究復研究，無殼蝸牛想等填海起屋，隨時耐過滄海變桑田吖，叮！

退一步講吖，就算填海工程無風無浪，順利落實，最快都要六年之後至提供首塊地皮，搞得嚟都唔知係幾時嘅事咯，就算港府等得，無殼蝸牛都唔等得啦。所以話啫，港府與其獨沽一味搞填海，不如實實際際諗吓其他增加土地嘅方法仲好啦，例如新界有大量土地荒廢養蚊，點解唔去開發呢？又例如大嶼山地方咁大，點解遲遲唔去發展呢？

講起都好笑，港府覓地建屋一向動作多多，又話發展新界東北，又話重建工廈，又話將社區用地改建公屋，甚至搞笑到叫港人瞓天橋底添，最後全部有姿勢，無實際，純粹得啖笑。計太一叮話齋，填海造地唔係唔好，最怕搞得嚟蚊都瞓、蛇都死嘅咋，叮！