奶粉激起中港怨 都是貪官惹的禍

有個咁嘅問題：如果阿媽同老婆同時跌落水，係先救阿媽，定係先救老婆？無論身為男人嘅你點樣回答，都一定會被人鬧。目前香港就面對咁嘅兩難處境，特區政府出招限帶奶粉出境，保障港孩利益，但就畀內地同胞鬧，中港矛盾愈演愈烈，都唔知點收科。

呢，三月一日起港府實施奶粉出境限帶令，沙田裁判法院尋日對三名犯禁內地客作出判決，各被罰款一千至二千五百元。其中一名男被告話喎，明白香港係法治之區，亦認為判罰合理，但佢又話內地畀咁多資源香港，點解內地人嚟香港買多罐奶粉都唔得？

呢位仁兄講出咗內地十多億同胞嘅心聲，佢哋覺得香港對內地同胞搞「聯合國禁運」係忘恩負義，不近人情。內地互聯網上更加沸沸揚揚，有人喪鬧香港限制奶粉出境，係漠視內地爸媽嘅痛苦，係對六千萬內地嬰兒見死不救。連官方喉舌都忍唔住發表評論，質疑香港人有生意唔做，有國難財唔發，係因為中央政府大力支持變得對掙錢懶惰和不敏感。

講真，內地同胞嘅講法唔係錯晒，話晒香港係自由港，人便其行，貨暢其流，推出限購措施有違自由市場原則。但有頭髮邊個想做瘌痢吖，如果唔係內地對香港奶粉需求太大，搞到一罐難求，港媽港爸怨聲載道，要求港府保障港孩優先飲奶權，當局又點會出手限制，拒商機於門外吖。

正如保安局局長黎棟國話齋，早前奶粉短缺，已經影響到香港嬰幼兒基本需要，政府出招係迫不得已。食物及衞生局局長高永文亦加把口解釋，指有關措施並非針對個人遊旅客，只係確保本地父母、嬰兒獲得足夠奶粉供應，希望內地民眾諒解喎。

可惜吖，無論港府高官點樣解畫都好，內地民眾始終唔肯接受，有人仲威脅要對香港斷水斷食大報復添。其實，香港人一向樂善好施，何況中港兩地係同胞手足，每次內地出事，水災又好，地震又好，香港人都係第一時間出錢出力，幫得就幫，又點會對內地同胞見死不救吖。不過咁，救人先要自救，幫人先要幫己，家陣香港自顧不暇，怪香港人忘恩負義，真係好冤枉囉。

講到底，呢場奶粉爭議嘅根源唔喺香港，而喺內地，今時今日嘅中國，乜都可以製造，上天落海，無所不能，甚至擁有神乎其技嘅太空對接技術，卻造唔出安全奶粉，怪邊個呢？咪內地嘅奸商囉，咪包庇奸商嘅貪官囉，係佢哋搞到中國人冇啖好食，同胞與其指摘香港人，不如將矛頭對準貪官及奸商，叮！