邁阿密診所揸數人爆料 占士食禁藥？
今年美國體壇連環爆出禁藥醜聞，繼單車名將岩士唐（Lance Armstrong）及紐約洋基球星洛迪古斯（Alex Rodriguez）之後，就連NBA巨星都捲入禁藥風波！據一位邁阿密抗衰老診所的離職員工爆料，熱火Icon勒邦占士（LeBron James）及魔術控衞尼爾遜（Jameer Nelson）都屬禁藥賣家波殊（Anthony Bosch）的「客仔」，2人每月定時定候購入類固醇及生長激素提升比賽表現，若然事件屬實，肯定成為NBA史上最大單的禁藥醜聞！
曾經獲波殊僱用為會計師的Jessica，於2010年至2012年期間為前者旗下一間邁阿密診所「揸數」，Jessica昨晨向美媒《IBN》透露，公司以賣抗衰老藥物作牌頭，實際上係賣類固醇及生長激素，大部分客人均屬有頭有面的運動員，為保密起見，只會在數簿上以顧客性名的頭1個英文字母記低交易紀錄。被問到哪些名字最印象深刻，Jessica隨即提到「LJ」及「JN」兩個顧客代號。
定期搵經理人攞藥
該名波殊舊夥計宣稱：「『JN』即係尼爾遜，佢會親自上嚟畀現金買貨，『LJ』就係勒邦占士，雖然佢冇蒲過頭，但成班同事都知佢就係『大帝』，1個叫Mr.Paul嘅人仲會每個月上嚟幫佢攞藥，佢係占士嘅好友兼經理人列治保羅（Rich Paul）！」
《IBN》刊登這篇報道的同時附上一段對話錄音，不少美國網民聽完之後都在討論區熱議，有網友更睇死「大帝」有用藥：「占士大隻成咁已經好難以置信，最離奇係傷患少兼長期保持高水準演出，話佢冇食類固醇叫人點信？你睇佢髮線後移成咁，就知係副作用啦！」
魔術尼爾遜都有份
禁藥醜聞吹到似層層，不過「大帝」就一於少理，昨日貢獻「20+10」率領熱火作客以97:81擊敗木狼連贏15場，締造球會史上最長連勝紀錄，明早面對由另一位禁藥疑雲主角尼爾遜孭飛的魔術，照計可以再下一城，主場讓到12.5分照捧上盤。
占士（右）身體條件同技術都比對手高一班，好難令人冇誤會。（美聯社圖片）
