好人當賊佬 食署太離譜

開講有話，節約光榮 ，浪費可恥。據講內地每年倒落垃圾桶嘅食物足夠兩億人食一年，香港又點呢？睇怕港人浪費食物嘅情況都相差無幾嘅喇。所以，善用廚餘，化廢為寶，大家都應盡一分力。

呢，長洲有團體利用廚餘種有機菜，每逢周六將收成免費派發，為咗吸引更多人捧場，掛起橫額宣傳都好正常啫。推廣減廢，保護環境，仲可以將有機菜免費派畀街坊，一舉數得，無論點睇都係好事。點知食環署墨守成規，唔識轉膊，居然好人當賊辦，喺毫無警告情況之下拆走宣傳橫幅，仲開埋罰單，話要向環保團體收番一千四百幾蚊移走橫額嘅費用喎。

叮！市民推廣環保，示範垃圾分類，避免浪費廚餘，竟然惹上官非，簡直不可思議。正如有人話齋，港府口口聲聲推動廚餘減廢，依家唔只冇提供協助，仲刻意刁難環保團體，根本係講一套做一套。食環署食古不化，揸住雞毛當令箭，搞到環保團體心灰意冷，聲稱唔再派菜，你話港產官僚係咪添煩添亂吖！

食環署仲死撐，話有關做法經地政總署核實，未經許可或不遵守實施指引而展示宣傳品，當局有權移走，並向相關人士追討費用，如果唔依期繳付，仲要徵收附加費添。簡直九唔搭八！

唔使扮晒嘢打晒官腔喇，如果真係有法必依嘅，就應該一視同仁。呢嗱，有啲宗教團體同組織長期喺旅遊熱點及交通樞紐展示大量橫額及宣傳板，影響市容兼阻擋司機視線，分分鐘釀成交通意外，點解食環署一直闊佬懶理，唔採取行動呀？當局選擇性執法，擺到明欺善怕惡啫。

講到選擇性執法，港產官僚屢試不爽，大家都見怪不怪咯。好似僭建問題咁，搞到尾大不掉，亂象叢生，完全係因為曾蔭權及前食衞局局長周一嶽等高官權貴知法犯法，如果當局有心打擊僭建，就應該遵守法律面前人人平等嘅原則，先向權貴開刀，而唔係一味對小市民喊打喊殺。

仲有吖，普通公務員貪一盒月餅就要革職查辦，而貪曾被揭發連串貪腐醜聞，廉署立案調查已經一年有多，到依家仲係冇聲氣，呢啲又算唔算選擇性執法吖？

計太一叮話齋，港產官僚是非不分，忠奸不辨，貪官當係寶，好人當賊佬，香港遲早畀佢哋玩死嘅咋，叮！