地產獨大百業苦　經濟轉型大隻講

加加加加加，商舖加租飛擒大咬，百行百業無啖好食，唔只小商戶難以招架，連富豪飯堂都吃不消，一個二個淪為地產霸權迫遷戶，再咁落去，香港人點搵食呀！

嗱，其中一個加租狂潮受害者就係富臨飯店。唔經唔覺，呢間富豪飯堂已經屹立銅鑼灣三十年，八三年月租二十萬元，家陣升到七十萬元，日前仲接獲業主通知將會加到一百三十五萬元添。租金一加就係一倍，想食咗人隻車咩，食肆唔想畀人魚肉，惟有搬舖。

加租狂潮洶湧澎湃，同一條街嘅富豪酒家亦面臨同一命運。樓價狂飆，業主講明打算將整幢大廈放售，要求年底租約期滿後只能續租半年，咁即係逼人搬啫。冇辦法喇，富豪酒家惟有物色新舖，另起爐灶。

正如食肆老闆話齋，飯店屹立銅鑼灣三十年，九七回歸、沙士、金融海嘯等風浪都撐得過去，反而敵唔過加租狂潮，簡直無奈。試諗吓，連專賣鮑魚、食客非富則貴嘅富豪飯堂都頂唔順，小本經營嘅店舖又點樣撐落去呢？各行各業又點可能有好日子過呢？

毫無疑問，樓市當旺，百業當災，高昂租金已經損害緊香港嘅經濟根基。唔使講富豪飯堂吖，就講其他平民食肆同小商戶，由於難頂租金壓力，執吓一間又一間，商舖加租潮觸發商戶結業潮，下一波就係輪到基層失業潮嘅喇。有學者指出，高昂舖租趕絕小商戶，清一色變晒做內地豪客生意嘅國際品牌連鎖店，最怕花無百日紅，一旦內地經濟逆轉，香港首當其衝，到時就一鑊熟o架嘞。

咁講啦，地產獨大，百業凋零，如果高樓價、高租金死結唔解，講乜都無用。有立法會議員提案促請當局推動經濟轉型，大力發展科研等產業喎。嗱，呢個本來係好提議，問題係地產獨大，本港經濟已經畀樓市扭曲到面目全非，邊有咁易轉型吖。其實，港府唔係唔想轉型，過去曾經提出唔少發展大計，例如數碼港、中藥港、六大產業等等，可惜港產官僚眼高手低，到頭嚟一事無成，咪惟有繼續靠地產及金融食胡囉。

一句講晒，富豪飯堂面對嘅困境，就係香港經濟嘅縮影，再咁落去，遲早畀加租狂潮一嘢衝散嘅咋。如果港產官僚唔想香港獨沽地產一味，靠炒樓過日子，咁就要速速諗計撥亂反正啦，須知市民冇啖好食，你哋一樣冇好日子過嘅咋，叮！