預算案懶理民生 守財奴盡失民心

中產變「終剷」，終日畀人剷。自稱中產嘅「最廢財爺」曾俊華日日畀人剷到上天花板，睇嚟荒謬中產論畀佢嘅回憶，唔止係睇法國電影，仲係食法國大餐——多件瘀（魚）……事。

當然啦，鬍鬚曾點燃全城怒火，中產論只係配菜，最惹火嘅主菜始終係呢一樣——紓困無方。喂，庫房再次水浸，派糖無加碼都夠衰啦，居然仲大幅縮水，退稅金額少一截，差餉寬免打斧頭，刻薄寡恩成咁，唔畀人剷到上天花板至奇啦。

嗱，鬍鬚曾想知輿情民意，唔使落街o架，睇《太陽報》同《東方日報》就知嘞。「東方報業民意調查」顯示，三成一受訪者對預算案失望，直指紓困措施杯水車薪；兩成八指無助市民紓緩通脹壓力，兩成七直斥鬍鬚曾敷衍市民，漠視民困。

無錯嘞，鬍鬚曾開口埋口講理財原則，其實佢嘅首要原則就係卸膊。扶貧可以唔做就唔做，派糖可以唔派就唔派，就算迫於形勢唔可以唔派，都係炒冷飯式敷衍了事。窮人三餐不繼？中產生活艱苦？對唔住，唔關佢事，唔好阻住佢去歎咖啡同睇電影！

所以話啫，預算案年年變失算案，嚇人嘅財赤預算次次轉虧為盈數百億，根本就係「狼來了」把戲。庫房扮無錢吖嘛，政府咪唔使派糖紓困囉；審慎理財吖嘛，守財奴咪大條道理一毛不拔囉。預算案五年來估錯數嘅累計金額高達三千二百幾億元，三成受訪者質疑係故意高估赤字；兩成三狠批鬍鬚曾係守財奴；兩成直指佢不擅理財。

調查亦顯示，三成二受訪者狠批預算案針對中產福利措施欠奉；三成一直斥預算案倒退；一成八不滿稅務政策極之保守。

鬍鬚曾出品嘅預算案有名史上最廢，今年仲倒退添，想唔認廢到無倫都唔得啦！不過，今日太一叮唔想鬧鬍鬚曾，大家知啦，鬍鬚曾講過，市民鬧預算案保守，佢當讚美，如果太一叮鬧佢廢柴，佢分分鐘當恭維咋。

所以咯喎，太一叮慳番啖氣，改為向鬍鬚曾推介一部法國電影《雙城記》。呢部戲深刻描述咗封建時代下嘅法國權貴生活腐敗，百姓長期生活喺水深火熱之中，結果心中鬱積嘅滿腔怒火爆發，觸發法國大革命推翻暴政。喂，鬍鬚曾，人民嘅忍耐係有限度嘅，守財奴不顧民瘼，等如與民為敵，一樣會被推翻！

民調如鏡，預算案懶理民生劣評如潮 ，結果必然係守財奴盡失民心，驚蟄到嘞，因住一覺醒來滿面鞋印呀，叮！