重組巴士路線 小心弄巧反拙

有人講笑咁講，如果戀愛好似等巴士，咁企喺站頭望穿秋水嘅癡男怨女，肯定九成都係香港人咯。

雖然係笑話，但亦係事實，巴士脫班誤點愈來愈嚴重，如果戀愛真係好似等巴士，咁香港人就慘咯，何只要癡癡地等，仲隨時被人呃添。你知啦，如果見到姍姍來遲嘅原來只係一架篤數嘅「鬼巴士」，隨時激到爆血管都似！

嗱，巴士服務亂象叢生，投訴多多，連當局都等到唔耐煩。運輸及房屋局局長張炳良向十八區區議會簡介重組專營巴士路線策略，話會透過軟、硬件加強巴士轉乘安排喎，例如增加路線組合、提高轉乘票價優惠、提升站頭設施等。佢仲話，區議會支持巴士路線重組，認為可以減塞車、減加價壓力、減空氣污染喎。

咁講啦，重組巴士路線唔係話唔好，話晒巴士服務誤入歧途嘅其中一個原因就係路線規劃失當，搞到有啲路線長期逼爆，有啲重疊嘅路線就拍晒烏蠅，經常出現兩架空巴士拍拖遊花園嘅荒謬情景，名副其實黐晒線，當局依家至嚟梳理，已經姍姍來遲咯！

不過咁，遲到好過無到，最怕係做咗等於無做，咁就嘥氣嘞。你知啦，港產官僚講就天下無敵，做就無心無力，減塞車喎，減加價壓力喎，減空氣污染喎，真係做到至好講。話時話，巴士路線重組唔係第一次，咁多年嚟塞車有冇減少到吖？空氣污染有冇減少到吖？巴士公司有冇發財立品唔加價吖？嗱，九巴啱啱至宣布加價咋，仲嫌加得少添，問你服未！

仲有吖，港產官僚一向懵盛盛，路線重組會唔會成為巴士公司偷雞嘅機會，借頭借路取消無利可圖嘅路線o架？係人都知，巴士服務要照顧市民利益，路線係豬腩搭豬骨，唔能夠因為客源少啲就唔做，如果今次當局睇漏眼，畀巴士公司有機可乘，乘客成為受害者，咁就弄巧反拙喇。

總而言之，路線重組係有需要，但更需要加強監管。一來確保路線重組方案令市民受益，二來金睛火眼（目及）實巴士服務有無走樣，咁至係改善問題嘅治本之道。如果唔係，路線再重組一百次都係嘥氣嘅咋！

一句講晒，巴士服務亂象多，撥亂反正勿蹉跎。乘客苦苦等待嘅唔止係巴士，仲有港府嘅監管，張炳良快快揸實盤軚，向着目標踩油，唔好再令市民失望嘞，叮！