學額短缺難治本 雙非禍港何時了

好嘞,政府終於就解決北區小一學額短缺問題交功課,推出應對措施,可惜又係頭痛醫頭腳痛醫腳嘅權宜之計,治標唔治本,最多暫時紓緩壓力,對解決雙非問題引發嘅種種亂象根本無補於事。

教育局嘅權宜之計係咁嘅,新學年北區小學將加開十四班小一,每班加派四至五人,另外向大埔區借四百個學額;如果被派往大埔嘅學童要求返回北區就讀,就要透過抽籤解決喎。

喂,又加班、又加人、又抽籤、又借學額,聽落好亂啫。不過無計喇,病急亂投醫吖嘛,連教育局高官都承認安排有啲混亂。其實混亂仲係其次,加班加人,令學校及教師壓力大增,隨時影響教學質素,咁先至誤人子弟吖!

當局話喎,小一學額不足屬短暫情況,隨着雙非零配額實施,情況會有改變。嗱嗱嗱,咪下巴輕輕,隨口噏當秘笈吖。咪話太一叮潑冷水,先唔講日後來港就讀嘅雙非兒童分分鐘遠超當局預算,就算今年學額短缺問題解決咗,明年又點吖?將來又如何吖?

講真,政府對於每年會有幾多雙非兒童來港就讀根本矇查查,只能一味靠估,見步行步,見招拆招。雖然當局已經叫停雙非啫,弊在過去十年雙非兒童已經累積到廿萬,就算按當局預測一半回流,都有十萬咁多,你話點頂吖。何況最後究竟幾多雙非兒童會回流,根本冇人可以預測,如果唔只一半,條數又點計呢?港產官僚唯一可以做嘅,就係繼續年年靠估,年年補鑊,年年攞家長同學生嚟搞。

講嚟講去,一日都係前朝曾蔭權政府靠害,佢胡混度日,對雙非孕婦來者不拒,留低呢個爛攤子,都唔知仲要亂到幾時。其實,正如家長話齋,跨境同雙非學童數字年年激增,北區學額短缺問題早已敲響警鐘,但當局一直熟視無睹,關人個關,卒之搞到七國咁亂,家長怨聲載道,貪曾簡直就係禍港禍民!

話時話,北區小一學額短缺只係雙非後遺症嘅冰山一角咋。今日小學淪陷,過多幾年輪到中學遭殃,跟住專上教育又會面對同樣問題,再落去手尾更長,就業、房屋、醫療、福利等等都會面對壓力,雙非問題簡直就係解唔開嘅死結。所以話,貪曾禍港,後患無窮,叮!

第一手消息請下載on.cc東方互動iPhone/iPad/Android/Windows Phone Apps