活化古蹟得把口 名為保育實毀育
歷史建築係一個城市嘅集體回憶,所以,活化歷史建築已經成為世界潮流。港府為咗趕時髦,開口保育,埋口活化,最弊講就天下無敵,做就無心無力。
嗱,新一批活化歷史建築夥伴計劃揭盅,大家估吓呢啲古蹟可唔可以變得生氣勃勃?答案係否定嘅。今次招標項目有四個,其中曾兩度流標嘅虎豹別墅將會變身中西音樂訓練學院,粉嶺裁判法院化身青年領袖發展中心,中區必列啫士街街市變成亞洲首間新聞博覽館,聽落好似唔錯,可惜備受關注嘅景賢里流標,都唔知究竟係可笑定可悲。
相信唔使太一叮多介紹,大家都知景賢里嘅歷史,呢幢紅牆綠瓦嘅古式建築已經有超過半世紀歷史,五年前畀人拆到甩皮甩骨,令唔少市民深感切膚之痛。家陣可以活化喎,結果居然流標,你都咪話唔令人失望!
活化計劃流標,唔通景賢里真係乏人問津?非也,其實有兩個團體入圍,只係最後雙雙落選啫。政府話喎,當年景賢里以換地方式保留,成本不菲,社會對相關活化工作有好大期望,所以評審要求唔能夠太低喎。唉,景賢里已經成為保育運動嘅橋頭堡,活化工作當然唔能夠馬虎,但如果唔可以活化,即係隨時變死化,一樣係大問題,如果下次又流標,咁點算先?
咪以為太一叮杞人憂天呀,呢,虎豹別墅已經流過兩次標o架嘞,搞到呢幢一級歷史建築丟空超過十年,依家先至名花有主。所以話啫,同樣搞活化,外國搞到有聲有色頭頭是道,香港就搞到唔湯唔水問題多多。希望景賢里下次名花有主啦,如果唔係,容乜易真係變咗一舊陳年化石o架?
歷史建築活化不成,隨時變唔生唔死,其實就算活化得成,亦隨時雖生猶死嘅咋。好多所謂嘅歷史建築活化項目已經變成商家生財工具,唔係化身高級酒店,就係變身貴價食肆,普羅百姓過門而不敢入,可望而不可即,咁嘅活化計劃有乜意義呢?咁嘅歷史建築同普通死物有乜分別呢?
都係嗰句啦,港府保育歷史建築不過係趕時髦啫,準則混亂,既無明確目標,又無長遠規劃,唔出問題至奇。嗱,一千四百幾幢所謂歷史建築,其中廿六幢已經畀人拆卸或者改動至面目全非。你話嘞,靠港產官僚保育,係咪得啖笑吖!
活化古蹟得把口,名為保育實毀育。計太一叮話齋,要活化歷史建築物,最緊要先活化港產官僚個腦袋,叮!