李安揚威奧斯卡 港片何時再出發

少年、老虎、救生艇，台灣導演李安化平凡為神奇，憑《少年Pi的奇幻漂流》第二度勇奪奧斯卡最佳導演殊榮，相當難得，可喜可賀！

正如有人話齋，李安得獎可以講係華人之光，香港人都替佢開心，而最開心嘅當然係佢家鄉台灣嘅民眾啦。李安上台領獎時，特別感謝台灣，仲話冇台中市政府嘅幫忙，冇可能拍得成呢套電影。咁又係呀，李安開拍此片之初，為取景大感頭痛，台中當局二話不說，表明願意協助，而且資助五千多萬元台幣，成就李安呢部傑作。所以話，一部出色嘅電影，係多方面合作嘅結果，導演個人才華同努力固然重要，而加埋政府嘅支持同推動咯喎，咁就如虎添翼，事半功倍喇！

講到呢度，不得不為香港嘆一口氣。曾幾何時，香港電影業蓬勃發展，喺東南亞一枝獨秀，有「東方荷里活」美譽o架，可惜時移勢易，隨着電影業逐漸北移，港產片風光不再。當然啦，盜版、資金、市場等問題亦係令港產片不振嘅原因，加上為咗遷就內地觀眾口味，題材難免有所局限。其實講真吖，香港電影界臥虎藏龍，不乏創意同人才，好似電影《無間道》咁，連荷里活都要翻拍，如果港府肯多啲關注、多啲援助，相信會有另一番局面，話唔埋港產片都可以揚威奧斯卡o架！

冇錯，港府係就係成立咗電影發展基金，可惜申請門檻極高，早就備受詬病。正如業界人士話齋，基金名為資助，實際係投資，政府計過冇錢賺就唔會資助，而且規定導演及監製必須有經驗，無形中扼殺咗新人嘅機會，起唔到扶植後進嘅目的。

唔止業界有彈冇讚，審計署亦踢爆電影發展基金問題多多。原來過去七年，電影發展基金資助電影活動項目總額高達一億五千萬元，但真正提供畀電影製作嘅就只得五千八百萬元，完全係本末倒置，預計到二○一五年，電影發展基金三億元將會耗盡。嗱，政府錢就使咗，但完全得不到預期效果，你話係咪嘥氣吖！

記得三年前電影發展基金資助嘅《歲月神偷》揚威柏林影展，當時係威係勢，大鑼大鼓，可惜高官抽水過後，港產片又回歸沉寂。太一叮唔係長他人志氣，滅自己威風o架，大家只要睇吓台灣政府，再睇吓香港政府，就明白點解李安可以揚威奧斯卡。

逆水行舟，不進則退，港產片風光不再，台灣片後來居上，港府同電影業界係咪都應該好好反思一下呢？叮！