財爺何不食肉糜 誰為中產定界線

財政司司長曾俊華做守財奴做到上晒癮，新一份預算案繼續孤寒成性，唔只冇長遠扶貧措施，連派糖炒冷飯都偷工減料，引起中產人士一片噓聲。最好笑嘅係，鬍鬚曾仲死撐，聲稱自己都係中產，明白中產之苦喎，簡直九唔搭八。

喂，月薪三十七萬元而且有豪華官邸及其他福利嘅高官都叫做中產，咁月入三十萬樓下嘅咪叫草根？月入十萬樓下嘅咪叫赤貧？唔怪得佢對中產苦況咁冷漠啦，原來喺佢本字典入面，中產嘅定義就係年薪幾百萬嘅權貴一族，咁仲使乜望政府派糖呀！

面對千夫所指，鬍鬚曾點解畫呢？佢話喎，自己成長於中產家庭，太太同兒女又係中產，連社交圈子都屬於中產，而中產嘅定義未必係收入，而係生活態度，好似鍾意飲咖啡同睇法國電影咁喎。

唉，唔怪得香港咁多窮人喇。一個連何謂中產都搞唔清楚嘅庫房大掌櫃，扶貧工作又點能夠對症下藥吖？一個何不食肉糜嘅中產財爺，對窮人苦況又點有切膚之痛吖？基層無飯開，去飲咖啡囉；蟻民無工開，去睇電影囉，過嘅都係中產生活吖，知冇！

講到呢度，大家應該知道點解港府扶貧愈扶愈貧啦，官老爺脫離民情，不食人間煙火，既唔明白市民心聲，更唔明白市民需要，政策點可能唔撞板多過食飯吖。港府開口埋口貼近民情，走入民間，從鬍鬚曾呢套中產論就知係吹水唔抹嘴啦！

叮佢個鎯鎯，鬍鬚曾上次鬧出「粟米斑腩飯」笑話，已經被人批評不食人間煙火，今次又鬧出「中產飲咖啡睇電影」鬧劇，反映佢係幾咁無知兼涼薄，難怪議員鬧爆佢嘅思維同市民「天各一方」。太一叮希望佢少啲去五星酒店飲咖啡，多啲去茶餐廳食粟米斑腩飯，體察民情，了解民生，如果唔係，下次再被人問起粟米斑腩飯幾錢一碟時，又係戇居居唔識答，咁就瘀爆啦！

咁講啦，鬍鬚曾，你唔只唔係中產，仲係政績窮光蛋，簡稱N無財爺，無承擔，無魄力，無良心，無頭腦，無料到，無厘頭……唉，其實鬧咁多都無用，鬍鬚曾話嘅，市民鬧預算案保守，佢當讚美，你鬧佢無能涼薄，佢分分鐘當係恭維嘅咋！

財爺何不食肉糜，誰為中產定界線。鬍鬚曾係咪中產仲係其次，最重要唔好再做守財奴，如果唔係，你真係會變「終剷」，終日被市民剷吖，叮！