熱火賽前鋤樽Show off 占士齋益自己人

全明星周末已經告一段落，不過「大帝」拒絕參戰入樽賽就繼續孭鑊！這位熱火球星近期頻頻於賽前「騷哥利」，連串高難度入樽動作熱爆互聯網，惹來一眾傳媒及球迷強烈譴責，指勒邦占士（LeBron James）寧願在無關痛癢的賽前練習Show Off都對入樽賽「見死不救」！

熱火近期有新搞作，於賽前投籃練習時加插入樽環節，基斯安達臣（Chris Andersen）、查馬斯（Mario Chalmers）及雷阿倫（Ray Allen）都有份湊熱鬧，就連球會都透過官方twitter呼籲球迷提早入場欣賞鋤樽騷，令比賽未開波已經人山人海。當中占士就屬全場焦點，繼周日飛過6呎10吋的劉易斯（Rashard Lewis）入樽後，前日就以一記高難度跨下鋤樽贏盡掌聲，片段熱爆互聯網。

之不過這場熱火入樽騷就惹來爭議，事關全明星周末入樽賽吸引力大減，「大帝」一次又一次拒絕參戰令球迷大失所望，但又頻頻在賽前練習「演嘢」，被球迷指摘「又要威又要帶頭盔」：「占士想話畀人知自己入樽勁，但又驚贏唔到入樽賽會冇面！」這位熱火Icon難忍譴責，昨日發晦氣表示取消鋤樽騷環節，勁小家！

至於另一位熱火巨頭韋迪（Dwyane Wade），就被踢爆與李寧牌的10年價值1億美元的贊助合約中有一項秘密條款，「閃電俠」必須在結束NBA生涯後到CBA効力至少1個球季，若然事件屬實，必定是亞洲籃球躉佳音。年屆31歲的韋迪近期狀態大勇，明日率領熱火出擊有力擒殺灰熊，主場讓6.5分要上盤。

（now635台周六早上9:00直播）