津貼遲遲未收到 社署玩殘老人家

孟夫子有云:「挾泰山以超北海,語人曰,我不能,是誠不能也;為長者折枝,語人曰,我不能,是不為也,非不能也。」當中嘅道理邏輯人人都識,未必人人可以做到,尤其係港府官僚,真係又蠢又懶,連幫長者折枝咁簡單嘅事都做唔好o架。

呢,港府向全港合資格長者發放每月二千二百元生活津貼,申請分為三個階段,所有六十五歲以上而又通過資產審查嘅長者,理應喺第一階段即二月二十五日起收到通知書,自動由生果金轉換成生活津貼。本來係好事嚟嘅,但有立法會議員收到長者投訴,話自己一向攞開生果金,而且已經通過資產審查,但唔知點解遲遲都未收到自動轉換通知書。老人家為此寢食難安,擔心自己攞唔到津貼。

社署話喎,之所以有合資格長者收唔到通知書,主要係因為電腦出咗問題,搞到部分長者資料無輸入系統,叫佢哋喺第二階段主動申請生活津貼咁話,咁咪即係要重新做過資產審查?官老爺輕描淡寫一句「電腦問題」,無數長者就咁畀佢哋玩殘,叮!

究竟電腦系統出咗咩問題,社署始終無清楚交代。今時今日,電腦出問題好容易整咋,使唔使搞到長津通知一塌糊塗,老人家左等右等,望穿秋水啊。怕就怕,唔係電腦出問題,而係人頭豬腦出問題。

正如立法會議員話齋,政府向立法會申請長者生活津貼撥款,以至向公眾交代都講明,會用最方便長者嘅方式處理,家陣因為部門出錯,令到部分合資格長者要自行申請,根本就唔合理。再講吖,如果當局有心補鑊,大可以主動查問當年負責審查嘅社工,向合資格長者補發通知書。社署官僚連咁簡單嘅事都唔肯做,仲唔係人頭豬腦!

唉,講開長者生活津貼,真係一匹布咁長。本來呢,港府向老人家發放津貼,點講都係一件好事,殊不知好事多磨,計劃提出以來爭議多多。一時因為資產審查激起議員拉布,一時又招惹查詢熱線打極唔通嘅投訴。當局寧願花費大量行政成本審理申請,都唔肯降低門檻畀更多長者受惠,呢啲咪叫善財難捨,冤枉甘心囉!

敬老政策玩長者,社署官僚又甩轆。講到尾,生活津貼杯水車薪,安老始終要靠全面退休保障。好心港產官僚扚起心肝面對現實,咪再詐傻扮懵啦,叮!

第一手消息請下載on.cc東方互動iPhone/iPad/Android/Windows Phone Apps