嚟緊嘅「九二八」，即下周一就係佔領行動一周年，可能唔少有份參與佔領嘅泛民主派中人隨時被「落鑊」，所以近期頻頻接受訪問，回顧佔領行動時，都將責任推卸畀其他人。其中喺佔領行動期間出錢出力、日日喺佔領區「打躉」兼扮指揮嘅壹傳媒集團前主席「肥佬黎」黎智英，尋日接受其喉舌媒體網站訪問時，竟然指摘部分泛民同本土派「收咗對家錢」，令好多市民對泛民產生誤解。其實肥佬黎先係泛民嘅最大金主，莫非佢真係把泛民當作自己嘅玩具，唔准其他人玩？

辯稱以港為家唔離開

有份參與佔領嘅肥佬黎，雖然可能面對被「檢控」，但佢喺成篇訪問中，都自我感覺良好，指佔領行動已經做得好好，無邊個人可以埋怨，講到整個行動「好好，perfect（完美）」，又話唔係一次抗爭就有效果。不過，佢就指整個佔領行動無人去策劃，無人去安排，全靠「學聯班細路仔去揸fit」做決定，佢哋嘅經驗有限，所以唔可以要求太高。

咁講法，肥佬黎擺到明同佔中三子一樣，都係將佔領行動失敗嘅責任，推卸晒畀學生。

肥佬黎之後又批評有部分「叫自己做泛民」嘅人，「收咗對家錢」搞泛民，令好多市民對泛民有誤解。佢又不滿有人利用本土派打擊民主運動，甚至相信部分人「收咗錢」，隨時被人解釋為「港獨」，「咁就死」喎。眾所周知，肥佬黎係泛民嘅最大金主，早前有密件公開，披露佢向泛民捐款多達四千幾萬元，佢捐錢畀泛民就大條道理，泛民收其他人捐款就唔可以，認真係雙重標準，莫非佢真係把泛民當作自己嘅玩具，唔准其他人玩？

之後肥佬黎又講到好多人喺政改後選擇移民，但佢聲言唔會離開，當香港係自己屋企，又自稱「對呢個社會唔多唔少有個責任」，放棄、逃避唔係一個選擇。肥佬黎講到咁大義凜然，但佢根本就有英國護照，佢多名子女都有海外居留權，而且佢經常離開香港，當香港係自己屋企？真係信佢至奇！

第一手消息請下載on.cc東網iPhone/iPad/Android/Windows Phone Apps