政壇：議員訪德國 樣樣話唔得
話說立法會教育事務委員會近日出訪德國，考察當地嘅教育、職業培訓同生涯規劃制度。訪問團尋日去咗黑森州，與多名州政府官員及議員會面，又參觀咗結合古蹟同現代設計嘅黑森州議會大樓，睇相似旅遊多過公務考察。
其中一名團友、議員EQ葛珮帆喺社交網站話，雖然德國嘅職業教育做得唔錯，但同時面對種種挑戰，包括年輕一代工作態度轉差、青年人搵唔到心儀嘅工作，出現有工冇人做、有人冇工做嘅錯配問題，同香港情況差唔多。
EQ又話德國嘅免費教育、學徒制、工業發展、服務業專業制度同吸引外來人才政策等，都好值得香港參考，但同時又唔能夠全盤照搬，強調香港要喺維持低稅制下，搵到適合嘅方法培育年輕一代。咪係囉！德國稅率咁高，國民失業、失學全部都有津貼攞，香港點學呢？都唔知班議員去嚟做乜？
