政壇：葉劉怕畀人當「跑道」
啱啱升任為政制及內地事務局副局長嘅Ronald陳岳鵬，喺未加入政府之前，曾經同新民黨主席兼立法會議員、行政會議成員葉劉淑儀一齊創立匯賢智庫，Ronald升職後，葉劉曾經話祝福佢，但尋日接受電台訪問時，就話「心情複雜」，指Ronald加入政府後，有更多人搵佢，擔心有啲人係搵佢做「跑道」加入政府喎。
葉劉指唔會話Ronald當佢係跑道去加入政府，但自從Ronald加入政府後，有更多年輕人想加入新民黨，但有啲人係搵佢做「跑道」，需要同年輕人講清楚，到底呢班年輕人係利用佢嘅網絡、光環，去識人跟住入政府，定真正支持佢嘅理念。
其實到目前為止，應該只係得Ronald一個人透過新民黨「升官發財」，唔難保該黨仲有好多黨員想借葉劉嘅力量，等機會上位，究竟有幾多黨員係想利用葉劉呢條「跑道」加入政府，葉劉就真係要自己了解吓喇！作為黨主席，自己訓練出嚟嘅新人可以有更好更大嘅發展機會，唔係應該感到自豪咩？
盼港休息修補撕裂
葉劉又話喺佔領行動後，有小巴司機話自己曾經幫過警員反佔中，指警方唔可以抄牌，搞到前線警員執法「好難做」，好大壓力。佢又話政改爭議同佔領行動係噩夢，導致社會撕裂，加上經濟有下滑嘅趨勢，認為香港需要休養生息，同埋修補社會撕裂。至於未來政府應唔應該重啟政改，佢就認為要視乎特區政府喺下屆立法會，可唔可以得到三分之二議員嘅支持。
至於新民黨日前發表政綱，就土地房屋、教育、貧窮等多個議題提出多個建議，全部都對準現屆政府仍未解決嘅問題。當被問到有冇興趣參選下屆特首時，葉劉就話目前要做好區議會工作。
